"Mundu sentsorial batean" barneratuko ditu herritarrak Xabi Lopez Jabatok
Iazko geldialdiaren ostean bueltan da Metamorfosi II teatro fisiko laborategia. Bigarren honetan animalietatik abiatuko dira eta pertsonai komikoen bilaketa izango da ardatza antzerkigilearen arabera.
Laborategia iragartzeko kartela. Abenduaren 27an bueltan izango da DesAires antzerki konpainiaren Metamorfosi teatro fisiko laborategia, bigarren edizioa egingo dutela iragarri berri du Xabi Lopez Jabato antzerkigile oiartzuarrak. Berak eskainiko ditu saioak, abenduaren 27tik 30era bitarte eta urtarrilaren 3tik 5era.
Jaques Lecoq-en pedagogian inspiratuta, “mundu sentsorial batean barneratuko” dira partaideak. “Inguratzen gaituen mundua ikertuz, bere erritmo, espazio, tonu, soinu eta formetan” inspiratu ahal izango dira izena ematen duten herritarrek, “mugimenduaren bidez emozioa deskubritzeko” asmoz.
Bigarren honetan animalietatik abiatuko dira eta pertsonai komikoaren bilaketa izango da ardatza Lopezen arabera: “Pertsonaia bat eraikitzera edo deseraikitzera iristeko modu asko daude, baina bidaia zehatz honetan animalien bidez egingo dugu neurri handi batean. Lurreko zein itsasoko fauna erabiliko dugu”.
“Inguratzen gaituzten elementuekin hasiko dugu lana eta jolas eszenikorako ezinbesteko mugimendu dinamikak aurkituko ditugu. Aurpegia maskaratuko dugu gorputza azaltzeko eta gorputz-eraldaketa bat ikertzen amaituko dugu, pertsonaia baten bilaketan. Pertsonai komikoaren plazerrean barrena”, azaldu du antzerkigileak.
Plazak mugatuak direla aurreratu dute, eta izena emateko bi aukera daude: mezu bat idatziz helbide elektroniko honetara, edo 647 915 592 telefonora deituta.
