Haurtzaroko ikasleak ere, indarkeria matxistaren kontra
Elkarretaratzea egin zuten atzo ikasleek eta langileek, beltzez jantzita, "ospakizun eguna ez zelako atzokoa, aldarrikapen eguna baizik".
A25arekin bat egin zuen atzo Haurtzaro Ikastolak ere. Indarkeria matxistaren gaia gelaz gela jorratu zuten, eta aurkakotasuna adierazteko beltzez jantzi eta elkarretaratzea egin zuten ikasleek, “ospakizun eguna ez zelako atzokoa, aldarrikapen eguna baizik”, haien hitzetan. Ikasleekin batera ikastolako langileak ere izan ziren. Indarkeria matxistarik gabeko bizitzak orain! lemapean bildu ziren, “komunitate parekide eta aske baterantz pausuak ematea” lortu nahi baitute, eta horretan jarraitzeko asmoa adierazi zuten.
Orain dela bi ikasturte abiatutako Hezkidetza taldetik dator atzoko mobilizazioaren ideia. Formakuntza ugari egin dituzte ikasturtean zehar, hausnarketarako tartea eman diete ikasleei, eta hainbat gai landu dituzte, tartean indarkeria matxistarena. Ikastolako kideen arabera, azken horren adibide da urteko agenda morea. Azaroak 25, martxoak 8 edo maiatzak 17 Ikastolan “egun berezi” egin direla diote. “Baina ez dira moreak egun horiek soilik, maiztasunez jarraitzen dugu indarkeriaren ertzak, emakume erreferenteak, aniztasun sexuala, homofobia edota gorputza bezalako gaiak ikasleekin batera lantzen. Ondorioztatutako ideia eta mezu horiek herrira eta familietara ere iris dadin ere saiatzen gara, denok aldaketaren parte izan gaitezen”, erantsi dute.
