DBHko ikasleak kultura eta hizkuntza aniztasuna lantzen ari dira, Garabide elkartearekin
Garabide izeneko proiektua abiatu dute herriko ikastetxeek, ikasleek aniztasunaren gaineko ezagutza eta kontzientzia kritikoa garatzen has daitezen. Sentsibilizazio kanpainak ere egingo dituzte.
Herriko DBHko ikasgeletan proiektu berri bati hasiera eman diote, kultura eta hizkuntza aniztasuna lantzeko helburuarekin. Garabide elkarteak gidatuko du proiektua, hizkuntza lankidetza egiten duen Garapenerako Gobernuz Kanpoko Erakundeak hain zuzen.
Elkarteak Errenteria-Oreretako ikastetxeetarako proiektu bat diseinatu du, dagoeneko abian dagoena, eta ikasturte amaierara bitarte iraungo duena. Honetan, ikasleek aukera izango dute aniztasunaren gaineko ezagutza eta kontzientzia kritikoa garatzen hasteko. Hala, elkarteak baliabideak eskainiko dizkie ikasleek aniztasunaren eta kulturen eta hizkuntzen arteko elkarbizitzaren gaiak landu ditzaten. Sentsibilizazio kanpainak ere aurreikusi dituzte, “etorkizuneko bizikidetza hobeago bati begira”.
2005ean sortu zuten Garabide elkartea. Ordutik, alde batetik, zubi lanak egiten ditu euskal komunitatearen eta munduko hainbat herrialdetako hizkuntza komunitate gutxituren artean, haien arabera, “euskararen esperientzia partekatuz komunitate horiekin beraien hizkuntzak biziberritzeko prozesuak indartzeko” asmoz. Bestetik, Euskal Herriko udalerri eta hezkuntza komunitateetan kultura eta hizkuntza aniztasunaren balioak eta komunitateen arteko ezagutza eta onarpenak elkarbizitzarako duen garrantzia balioan jartzea da ere proiektuaren helburu nagusietako bat.
