Sorterri-etxeak, Jantziaren Zentroko lehen protagonistak
Andaluziako, Extremadurako eta Galiziako jantziek emango diote kolorea Jantziaren Zentroko urteko lehen erakusketari. Bihar, hilak 8, izango du lehen eguna.
Erakusketan dauden jantzietako batzuk. Errenteriako sorterri-etxeak izango dira Jantziaren Zentroko lehen erakusketaren protagonistak. Bihartik aurrera, hilak 8, eta otsailaren 27ra bitarte, Andaluzia, Extremadura eta Galiziako jantzi tradizionalak egongo dira ikusgai museoan. Hamalau jantziz osatutako erakusketa da, hamar emakumezkoenak eta gainontzeko lauak gizonezkoenak. Sorterri-etxeen eta Iraultza Dantza Taldearen arteko elkarlanaren emaitza da erakusketa. Kapitain Etxeko sarreran ikusi ahal izango da doan.
Concha Rociera eta Aljarafe sorterri-etxeek Sevillako apirileko feriara eramango dute bisitaria. Emakumezkoen jantziek Andaluziako kolorea eta bertako argia islatzen dute. Bikote batek Rozio herrirako erromeriarako bidean lagunduko du, Huelvan Mendekoste igandeko asteburuan egiten den ibilbide berezian.
Extremadura Monfrague Kultur Elkartearen eskutik ezagutu ahal izango da. Cacereseko lau jantzik ordezkatuko dute erkidegoa, Torrejoncillo eta Cabezabellosa herrietako bikote banak irudikatuta. Gainera, Montehermoso herriko emakumezko kapela berezia ere aurkituko dute bertaratzen direnek.
Galiziako jantziak Triskele Gaita Eskolarenak dira. Coruña eta Lugoko probintzietako jantzi bana, eta Koraza jantzia egongo dira ikusgai. Lastozko azken jantzi horrek txorimaloa irudikatzen du.
Ordutegi berriak
Urte berriarekin batera, Jantziaren Zentroak ordutegi berria estreinatuko du. Aurrerantzean igande eta jai egunetan ordubete gehiago egongo da zabalik museoa. Larunbatetan, igandetan eta jai egunetan 11:00etatik 14:00etara egongo da zabalik.
