Asteburuan hasiko da herrialdeko batel liga
Hibaikako, San Juan-Koxtapeko, San Pedroko, eta Trintxerpe-Illunbeko ordezkariak bertan arituko dira emaitza onenak lortzeko lanean.
Behe mailako taldeetako bat batelean. Argazkia: Hibaika Asteburuan hasiko da Gipuzkoako Batel Liga, eta prest dira Oarsoaldeko lau klubetako ordezkariak onena emateko uretan. Lehen estropada asteburuan izango da, igandean zehazki (hilaren 16an). Maila ezberdinetako arraunlariak, Urumea ibaian, Donostiako Loiola auzo parean ariko dira 12:30ean hasita. Hibaikako, San Juan-Koxtapeko, San Pedroko, eta Trintxerpe-Illunbeko ordezkariak bertan arituko dira emaitza onenak lortzeko lanean.
Egutegia behin behinekoa bada ere, ligan jokatuko dituzten gainontzeko 11 jardunaldiak, eta txapelketaren data ere zabaldu du Gipuzkoako Arraun Federazioak. Ligako bigarren estropada San Pedrok hartuko du hilaren 22an; Trintxerpek, hirugarrena, hilaren 30ean; Hernanik, laugarrena, otsailaren 5ean; Zumaiak bosgarrena, otsailaren 12an. Seigarren estropada Errenteria-Oreretan izango da otsailaren 26an Hibaikak antolatuta, eta Tolosak hartuko dio lekukoa martxoaren 6an. Zarautz (martxoak 13), Urdazuri (martxoaren 19an), Getaria (martxoaren 20an), eta Legution (martxoak 27) jokatuko dituzte beste estropadak. Hamabigarren jardunaldia Donibanen egingo dute apirilaren 2an eta hurrengo egunean jokatuko da Gipuzkoako Batel Txapelketa ere Pasaiako Badiako uretan.
