Koldo Mitxelena Institutua 'egin dutenak' omentzeko erakusketa
Bost hamarkada luze bete ditu Koldo Mitxelena ikastetxeak. Hainbat belaunaldi pasa dira bertatik, makina bat gazte hazi eta hezi dira bertan, baina jasotzeaz gain, eurek ere eman diote institutuari.
Koldo Mitxelena Institutuaren urteurrenaren harira ikasleekin egindako ekitaldi bat. Argazkia: Koldo Mitxelena Institutua Bost hamarkada luze bete ditu Koldo Mitxelena ikastetxeak. Hainbat belaunaldi pasa dira bertatik, makina bat gazte hazi eta hezi dira bertan, baina jasotzeaz gain, eurek ere eman diote institutuari. Bertan aritutako irakasle, langile eta ikasleek jantzi dute ikastetxea berrogeita hamar urte luze horietan eta horien omenez, erakusketa zabalduko dute orain Xenpelar Etxean.
Hilaren 14an, ostiralean, irekiera ofiziala egingo dute eta, larunbatetik otsailaren 5era arte izango da bisitatzeko aukera Xenpelar Etxearen beheko solairuan, astelehnetik larunbatera 17:00etatik 20:00etara.
Atzera begirakoa da erakusketa antolatzaileek zehaztu dutenez, eta Koldo Mitxelena institutuaren historiaren narrazio gisa planteatu dute, “hezkuntza sistemaren bilakaera erakusteko asmoz, testuinguru soziopolitikoaren emaitza baita”.
Planoak, klaustroen aktak, Errenteriako Udalaren artxiboa, argazkiak, egunkarietan argitaratutako albisteak eta material didaktikoa baliatu dute omenaldia izan nahi duen erakusketa ontzeko. Lau etapa nagusi jaso ditu erakusketak, ikastetxearen bilakaera erakusteko: proiektua eraikitzeko unea, Francoren diktadurarekin bat datorren institutuaren hastapenak, trantsizio politikoan eman zen hezkuntza sistemaren eraldaketa progresiboa, eta Koldo Mitxelena Institutua DBH sartu zenetik gaur egunera arte.
Institutuaren parte izan zirenak, Koldo Mitxelenan izandako bizipenetara modu hunkigarrian eramatea dute helburu erakusketaren bidez antolatzaileek.
