Sara Pinaren hilketa salatuko du mugimendu feministak, bihar
38 urteko emakumea etxean hilda aurkitu zuten, astelehen goizean. Bere senarra atxilotu dute Bordeletik iparraldera, susmagarri nagusi bezala.
Oiartzungo mugimendu feministak Azaroaren 25ean egindako mobilizazioaren irudia. Oiartzungo Feministen Asanbladak eta Hatzamarkak mobilizazioa deitu dute bihar arratsalderako, Sara Pinaren hilketa gaitzesteko. Elkarretaratzea egingo dute, Done Eztebe plazan, 18:30ean.
Sara Pina 38 urteko tuterarra hilda aurkitu zuten pasa den astelehenean, lantokian falta eta suhiltzaile eta foruzainak bere etxera joan zirenean. Labankadak zituen sabelaldean.
Ikerketaren arabera, Pinaren senarra da susmagarri nagusia. Atzo atxilotu zuten, Bordeletik 65 kilometro iparraldera. Sakelako telefonoa etxean utzita ihes egin zuen, eta ez zen lantokian agertu. Epaileak bera atxilotzeko euroagindua eman zuen.
2003tik indarkeria matxistagatik Euskal Herrian hil duten 113. emakumea da. Pinaren hilketa da 2022ko lehenengoa.
Udalak bat egin du
Oiartzungo Udalak, ohar baten bidez jakinarazi duenez, bat egin du mugimendu feministak biharko deitu duen mobilizazioarekin. “Gogor” gaitzetsi du hilketa, eta “gizarte parekide baten alde” lanean jarraitzeko konpromisoa berretsi du, non emakumeen bizitzak arriskuan egongo ez diren.
Udaletxeko balkoian puntu lila jarri dutela jakinarazi dute. Horrez gain, gogorarazi dute indarkeria matxista jasaten duten oiartzuarrentzako baliabideak jartzen dituztela.
Oiartzungo Gizarte zerbitzuak
- Helbidea: Udaletxeko beheko solairua.
- Telefonoa: 943 49 05 52.
- E-posta helbidea.
24 orduko arreta zerbitzua
- Telefonoa: 900 840 111
(Indarkeria matxistaren biktima diren emakumeentzako Eusko Jaurlaritzaren Informazio eta Arreta Zerbitzu espezializatuaren telefonoa eguneko 24 orduetan dabil urteko egun guztietan. Doakoa da eta ez du arrastorik uzten telefono-fakturan).
Larrialdiak
- 112.
- Oiartzungo udaltzaingoa: 943 49 33 11.
