"Ikasleen ongizatea oinarri eta autonomia helburu" dituen hezkuntza proiektura gonbidatu ditu gurasoak Orereta Ikastolak
HH, LH, DBH eta Batxilergoan matrikulatzeko kanpaina abiatu berri dute. Haur zein gaztetxoak "proiektu euskaldun, nazional eta burujabe" honetan murgiltzeko interesa duten gurasoek hilaren 28ra bitarte izango dute izena emateko aukera.
Matrikulazio kanpainarako zabaldu duten kartelaren irudi bat. Orereta Ikastolak Haur Hezkuntza, Lehen Hezkuntza, Derrigorrezko Bigarren Hezkuntza eta Batxilergoan matrikulatzeko kanpaina abiatu berri du. Beraz, euren haur zein gaztetxoak “proiektu euskaldun, nazional eta burujabe” honetan murgiltzeko interesa duten gurasoek hilaren 28ra bitarte izango dute izena emateko aukera. “Haur eta gaztetxoen ongizatea oinarri eta autonomia helburu dituen hezkuntza proiektu” honetan murgiltzera gonbidatu dituzte gurasoak, “Euskal Herrian, euskaran zein euskal kulturan oinarritua eta beste hizkuntza nahiz kulturei irekitakoa” baita Orereta Ikastola.
Ikastolak haur eskola zein bi urtetik aurrerako gelak eskainiko ditu datorren ikasturtean, “ikaslearen beharretatik, nahietatik, gustuetatik, jakin-minetik abiatuta”. Haur bakoitzaren senetik eta erritmotik abiatutako ikasketak dituzte oinarri, finean, Ikastolaren helburua baita haurra izan dadila bere bizitzako protagonista. Eta bide horretan, Ikastola izango dute bidelagun. “Haurra proiektu eta prozesuaren erdigunean jartzea dugu xede”, gaineratu dute Ikastolako iturriek.
Egun, LHko eraikina Añabitarten dago, “herriko arnasguneetako batean”. Ikastolaren arabera, honek konpetentziak ikasgelatik kanpo ere lantzea laguntzen du, eta horretarako, belardi eta zuhaitzez gainera, “aire zabaleko gune pedagogikoak” nabarmendu dituzte, esaterako, baso eskola, baratzea eta jolasgaraiko proiektua.
Baso eskola “hezkuntzako proiektuaren parte” dela gaineratu du Ikastolak. “Ikasgela basora eramaten da, eta aldi berean, basoan
egindakoa gelara transmititzen da”. Haur eta LHko ikasleek gozatu ahalko dute proiektu honekin.
Ikasketetan bidelagun izateaz gainera, adin eta maila guztietako ikasleentzako jangela zerbitzua ere eskaintzen du Oreretak. Eguneroko otordu guztiak bertan kozinatzen dira, garaian garaiko eta bertako produktuekin.
Ikasleak Añabitarteko, LH zein DBHko eraikinetara eramateko garraio zerbitzua ere badu Ikastolak. Informazio gehiago eskuratzeko interesa dutenek, helbide honetara idatzi edota telefono zenbaki honetara hots egin dezakete: 943 52 03 97
