Laguntzaile sareari eskerrak emango dizkio bihar Hibaikak
Arraun txiki bat oparituko diete, "arraunean jarrai dezagun, bai gaur, bai etorkizun hurbilean, elkarrekin indartsuagoak garelako".
![Banderarik eskuratu gabe igaro dira azken asteburua [Irudia: Hibaika]](https://oarsoaldea.hitza.eus/site/files/2021/08/hibaika.jpg)
Banderarik eskuratu gabe igaro dira azken asteburua [Irudia: Hibaika] Hibaika Arraun Elkarteak bere masa soziala handitu eta herrian babes gehiago lortu nahi du, hori izango dute hurrengo erronka. Bide horretan, azken urte eta hilabeteetan alboan izan dituen laguntzaileak eskertu ditu klubak. Hala, bihar (hilak 18), 19:00etan, “modu sinbolikoan” arraun txiki bat oparituko die laguntzaile sarea osatzen dutenei, “arraunean jarrai dezagun, bai gaur, bai etorkizun hurbilean, elkarrekin indartsuagoak garelako”.
Klubak aitortu du COVID-19aren pandemia “gure gizarteko onena eta txarrena ateratzen ari dela”, eta ikuspuntu horretatik zorionekotzat jo du “geure burua gure gertuko kolaboratzaileek erakutsi diguten laguntza eta konplizitatea”. Arraunlariei balioak transmititzea eta herriaren izena Kantauri isurialde osoan ikustaraztearen garrantziaz hitz egin dute, baina hori guztia “ezinezkoa izango litzateke klubaren egunerokotasunari eusten dion laguntzaile sare eskuzabal hori gabe”, haien hitzetan.
Hurrengo helburua herriko beste sektore batzuekiko konplizitateak ehuntzea dute. “Sektore horiek, agian, gure kiroletik pixka bat urrunago egongo dira, baina haien formara ere jarraitzen digute, eta gure proiektuan beren aletxoa eman dezakete, guztiok baikara beharrezkoak”, gaineratu dute klubeko kideek.
Egun, Hibaikak 110 kirol fitxa inguru ditu, eta ehun bazkide baino gehiago, “azken urteotan lortutako lan gogorraren eta emaitza bikainen ondorioz”. Hala eta guztiz ere, klubak nabarmendu du zifra horiek transmititzen dutena baino handiagoa dela taldearen eragin soziala.
Amaitzeko, proiektura batu nahi duten saltoki edo erakunde guztiei euren hondar aletxoa jartzera gonbidatu dituzte, “etorkizuna gaur bertan hasten baita”.
Sare handia
Laguntzaile asko eskertuko dituzte biharko ekitaldian. Papresa, Altzate Berri, Jamones Ancin, Susperregi Edukiontziak eta udala eskertuko dituzte lehenik, horiek baitira babesle nagusiak; Michelena y Lecuona, Etxeondo, Rosmi, Carrocerias LB, Innovahotel eta Begi Optika esponsorrei ere eskertza egingo diote; eta azkenik, laguntzaileak aipatu ditu klubak: Pumpkin, Laboral Kutxa, Oarso Hileta Zerbitzuak, Arana Zrtbitzu Grafikoak, Errenkoalde-Ostari-Errenteriako Merkatua, Orereta Asesores, Aterpe Inmobiliaria, Valentin Foto/Bideoa, Sorgintxulo zapatagintza, Samar Administrazioak, Salto Systems, Gure-Bus, Cine Reyna Taberna, Gailur Taberna, Bar Maite, Bar Viteri, Arkaitza Taberna, Gamon 14 Taberna eta Landare Taberna.
