Herriko ganaduzaleek zita dute larunbatean, Larre Planaren harira
Udalarekin eta aldundiarekin elkartuko dira, hilaren 22an. Iaz egindakoak eta aurten datozenei buruzkoak izango dituzte hizpide.
2021eko bilera [Arg.: @oiartzunudala].
Oiartzungo abeltzain eta ganaduzaleek hitzordua izango dute datorren larunbatean, hilak 22. Udaleko eta aldundiko ordezkariekin elkartuko dira, 11:00etatik aurrera.
Lau puntuko gai-zerrenda izango dute mahai gainean:
- Goilarre programa.
- 2021ean egindako mendiko lanen berri ematea.
- 2022rako beharrak jasotzea.
- Norberak lekarkeena.
Bileran egongo den parteetako batek —udalak— adierazi duenez, beraientzako “funtsezkoa” da herriko mendien mantenua egitea eta ustiapen egokia. “Horregatik”, gogorarazi dute, “Aldundiarekin eta Oiartzungo ganaduzaleekin batera Larre Plana gauzatzen du”.
Nabarmendu dutenez, hiru eragileen arteko harremana “urte osoan” ematen da. Horren harira, mendiko beharrak identifikatu eta beharrezko lanak aurrera eramaten dituzte.
Urteroko batzarrean, baina, jarraipen taldean ez dauden ganaduzaleekin zuzeneko harremana izateko aprobetxatzen dela jakinarazi du udalak.
