Pello Lizarralderen 'Argiantza' aztertuko dute gaur
Irakurketa Taldeak hitzordua izango du gaur, zinema aretoen beherakadaren aroa islatzen duen eleberriarekin. Datorren hilabeterako, 'Mari-mutil handi baten bluesa'.
Pello Lizarralderen 'Argiantza' izango dute hizpide. Irakurketa Taldeak urteko lehenengo hitzordua izango du gaur arratsaldean. Pello Lizarralderen Argiantza eleberria irakurtzeko geratu dira, 20:00etan, Manuel Lekuona bibliotekan.
Liburua 1980ko hamarkadan kokatuta dago, zinema aretoek izan zuten gainbeheraren aroan. Lotsa gutxi eta eskrupulo gutxiago dituen zinema areto bateko gerentea da protagonista.
Datorren hilabeterako etxeko lanen berri ere badute. Mari-mutil handi baten bluesa irakurriko dute, Leslie Feinbergena. Fermin Zabaltzak euskaratu du eleberri hori.
Nobelan Jess Goldberg pertsonaiaren bizia agertzen da, New Yorkeko estatuaren iparraldean hazi zena 1950eko hamarkadan urtea aldera, langileen klaseko auzo batean. Eleberriaren zatirik handiena 1970eko hamarkadan gertatzen da. Jess oso goiz ohartzen da ez dela gainerako neskak bezalakoa: gorrotatzen du soinekoak janztea, eta maiz galdetzen diote: “Zer zara zu, mutikoa edo neskatoa?”.
