Luzuriaga erosteko gestioak hasi ditu Pasaiako Udalak
Nafarroako Gobernuaren zatia erosteko lehen izapideak egin ditu Izaskun Gomezek. Donostiako Udala ere, fabrika Pasaiak eskuratzearen alde agertu da.
Izaskun Gomez Pasaiako alkatea Elena Saiz Nafarroako Gobernuko Ekonomia eta Ogasun kontseilariarekin bildu da, Luzuriaga fabrikaren eraikina erosteko gestioak hasteko. Nafarroako Gobernua nahiz Donostiako Udala eraikina Pasaiak eskura dezan alde egiteko prest agertu direla aitortu du udalerriko alkateak.
Jakina denez, Pasaiako Udalak 6 milioi euro jasoko ditu Luzuriagan proiektu kulturala abiarazteko, EH Bilduren negoziaketei esker, Espainiako Aurrekontu Orokorretatik. Funts hori azpiegitura erosi eta egokitze lanak hasteko baliatuko dela azaldu du udalburuak, Antxon kultura- eta gizarte-izaerako zentroa sortzen hasteko, alegia.
Lehen pauso horiek eman ahal izateko, ordea, eraikina erosteko akordioak lortu beharko dira. Gomezek adierazi du inplikaturiko erakunde guztiekin harremanetan jarriko dela hartarako; izan ere, eraikina bere garaian hainbat zor kitatzeko ordain gisara esleitu baitzen, eta horren ondorioz jabetza ICOrena (%87), Nafarroako Gobernuarena (%7) eta Gipuzkoako Foru Aldundiarena (%6) da.
Hitzarmen horiek sinatzeko bideko lehena da alkateak nafar kontseilariarekin izan berri duen bilera. Aurreratu du, aldi berean, lehen hartu-emana izan duela dagoeneko Donostiako Udalarekin (administratiboki donostiarrak diren lurretan dago eraikita Luzuriaga) hirigintza egoera zehazteko. Gaur arte inplikatutako bi aldeak beharrezko izapideak ahalbidetzeko “prest” agertu direla baietsi du Gomezek.
