1.510 sinadura erregistratu ditu SOS Antxok udaletxean
Barrutiaren etorkizunari buruz erabakitzeko eskaera eta zenbait galdera helarazi dizkiete udalburuei. Alkatetzaren "sinesgarritasun eza" ere salatu dute.
SOS Antxo Koordinakundeko hainbat kide, atzo, udaletxean sinadurak erregistratu aurretik. 
SOS Antxo Koordinakundeak atzo, asteartearekin, erregistratu zituen udaletxean abendutik gaurdaino bildutako antxotarren 1.510 sinadurak. Topoaren lurperatze lanen gainean erabakitzeko prozesu parte-hartzaile lotesle bat eskatu eta hainbat galdera helarazi dizkiete gobernariei horrela.
Koordinakundeko kideek aipamen berezia egin diote Izaskun Gomezek berriki Luzuriagaren alde emandako pausoari, eta adierazi dute “begi onez” ikusten dutela Pasaiako udalburua Nafarroako Gobernuarekin negoziatzen hasi izana eraikina erosteko. Horrekin, funtsezkotzat jo dute azpiegitura berria diseinatzeko eta horren erabilera adosteko antxotarren hitza kontuan har dadin.
Alkatetzaren sinesgarritasun eza
Aurrerapausoak ospatu dituzten bezala, bete gabeko hitzemateengatik ezinegona ere ageriko egin dute antxotarrek. “Ezin dugu alkatetzaren sinesgarritasun eza kritikatu gabe utzi”, kexatu dira, “hitzeman baitzuen obrak ez zirela informazio-bilera baino lehen hasiko, eta hori ez da gertatu”. Alkateak urtarrilean biltzeko asmoa ageriko egin zuen prentsan, eta halakorik ez da gertatu gaur arte.
Koordinakundeak sinaduren erregistroa probestu du bizilagunen hainbat kezka ere udalburuei helarazteko, galdera sorta bat erregistratuz izen-abizenekin batera. Horrez gain, egoera epidemiologikoaz kontziente, alkateari eskatu diote egitekoa den bilera hura “lokal zabal batean” gauza dezan, nahi duen orok izan dezan bertaratzeko aukera.
