Sarriegi eta gainontzeko zigortuak herrian nahi dituztela aldarrikatuko dute
Elkarretaratzea deitu dute gaur arratsalderako, '13/13' auziko zigortuei elkartasuna adierazteko. "Onartezina" dela salatuko dute.
Irailean egin zuten elkarretaratzea, epaiketa salatzeko. Sarriegi bera pankartari eusten ari zaio, erdian. Espainiako Auzitegi Nazionalak Arantza Zulueta, Naia Zuriarrain, Jon Enparantza eta Iker Sarriegiren kontrako sententzia kaleratu zuen atzo, 13/13 auzia deitutakoagatik. Kartzela zigorra ebatzi dute euskal presoen asistentziarekin lanean aritu ziren lau lagun horientzat.
Sarriegi Oiartzunen bizi da, eta bere herrikideek elkartasuna adierazi nahi diete bai berari baita gainontzekoei ere. Horregatik, elkarretaratzea deitu dute gaur arratsalderako. 18:00etan jarri dute zita, herriko plazan.
Antolatzaileek mezua zabaldu dute sare sozialen bitartez: “Berriz min hau. Berriz ere Espainiako Auzitegi Nazionaletik espetxe zigorrak, presoen eskubideen alde lan egiteagatik. Onartezina!”.
Adierazi dutenez, Euskal Herrian “bakea eta elkarbizitzaren bidean” pausoak ematen ari diren bitartean, “Espainiako estoldetatik errepresioa, ukazioa eta sufrimendua baino ez dator”.
Horregatik, Sarriegi eta gainontzekoak “herrian” nahi dituztela exijituko dute gaur arratsaldean.
