'Tipularen sehaska kanta' dokumentala, Niessen Kulturgunean
Lander Garro dokumentalaren zuzendari errenteriarra bertan izango da bere lana aurkezten.
Lander Garro zuzendariak Tipularen sehaska kanta dokumentala aurkeztuko du Niessen Kulturgunean hurrengo asteartean, hilak 5ean, 19:30ean. Presoek bere egoera duinduko duen osasun-zerbitzu bat eskuratzeko duten eskubidea aldarrikatzen duen dokumentala egin du Garrok. Horretarako, zuzendaria kartzelan gaixo egotearen esperientzia bizi izan dutenengana jo du, zer ondorio duen hobeki ulertzeko.
Dokumentala lehen pertsonan kontatua dago, eta, 1942an kartzelan hil zen Miguel Hernandez poeta espainiarraren Nana de la cebolla olerkitik abiatuta, analogia historikoa egiten du Garrok. Heriotzarekiko eta sufrimenduarekiko dugun beldurra kontatzen du dokumentalak. Izan ere, bizitza eta heriotza naturaren bidez irudikatu nahi ditu zuzendariak.
Interesdunek sarrerak lortzeko hiru modu izango dituzte. Batetik, hemen klik eginez. Bigarrenik, Lekuona Fabrikan eros ahal izango dituzte. Niessen Kulturguneko lehiatilan ere egongo dira sarrerak salgai, saioa hasi baino ordubete lehenago.
