"Sententzia hau injustizia bat dela salatu nahi dugu"
Iker Sarriegiri elkartasuna adierazi diote bere herrikideek. Zigorrik ez ezartzea eta konponbidea aldarrikatu dituzte.
Iker Sarriegi eta 13/13 auzia-n zigortu dituzten gainontzeko hiru lagunei elkartasuna adierazi diete gaur arratsaldean, Oiartzungo plazan.
Espainiako Auzitegi Nazionalak atzo ezagutarazi zuen sententzia “larria” dela salatu dute elkarretaratzearen ondoren egindako irakurketan, “sufrikarioa” eragiten dutelako eta “konponbide demokratikoa” oztopatzen dutela iritzita.
Auziak iraun dituen 11 urteak zein epaiketa bera “jasanezinak” izan direla esan dute. “Auzipetu, senide eta lagunek krudelkeria segida luze bat nozitu dute. Haientzat guztientzat gure berotasun, babes eta elkartasuna, bereziki Iker eta bere senide eta ingurukoentzat”.
Euskal Herrian irekitako “denbora berriaren” ondoren, “Dena da ETA” printzipioa salatu dute. Horrela, 13/13 epaiketa denboraz eta lekuz kanpo dagoela adierazi dute.
“Sententzia hau injustizia bat dela salatu nahi dugu, irregulartasunez eta eskubide urraketez beteta: tortura salaketak, abokatuen bulegoen erregistroak, CNIren esku-hartzea…”, gogorarazi dute. Epaiketa berme juridiko “gutxirekin” egin dela gaineratu dute. “Non eta Auzitegi Nazionalean, alegia, salbuespenezko epaitegi batean, zeinaren funtzioa euskal herritarroi salbuespenezko legalitatea eta zigorrak ezartzea den”.
Manifestazioa, hilaren 9an
Atzerapausotzat jo dute sententzia, eta “demokrazia, bakea eta gure herriaren etorkizuna jokoan” daudela uste dute. “Konpromisoak inoiz baino beharrezkoagoak dira, guztion artean bake eta bizikidetzan oinarritutako etorkizuna eraikitzeko, euskal gizarteak eskatzen duen norabidean, aurrera egitea oztopatzen diguten iraganeko estrategiak, jarrerak eta jokabideak alboratuz”.
Auzipetuei babesa emateko “elkartasun uholdea” adieraztera deitu dute, eta horretarako hilaren 9an —larunbata—Donostian egingo den manifestaziora joateko gonbita egin dute. Saguestik aterako da, 17:30ean.
Bukatzeko, berretsi dute “Iker eta gainontzekoak herrian” nahi dituztela.
