Udalbatzak Mendebaldeko Sahararen inguruko mozioa onartu du
EH Bilduk egin du proposamena, eta EAJ zein Ahal Dugu-Podemosen bozkekin egin du aurrera. PSE-EEk aurka bozkatu du.
Mendebaldeko Sahararen aldeko elkarretaratze bat, Pasaian. EH Bilduk Mendebaldeko Saharak bizi duen egoeraren inguruan aurkeztutako mozioa onartu du Pasaiako Udaleko osoko bilkurak. Bilera joan den asteartean egin zen, eta PSE-EEk mozioaren aurka bozkatu bazuen ere, proposamenak aurrera egin zuen EH Bildu, EAJ eta Ahal Dugu-Podemosen bozkekin.
Mozioaren arabera, Espainiako Gobernuak Mendebaldeko Sahararen inguruko jarrera errotik aldatu du, baita NBEren ebazpen zein Nazioarteko Zuzenbidearen aurka jo duela ere. Hori dela eta, mozio bidez ardura eskatu diote Espainiako Gobernuak Marokoren aldebakarreko proposamena onartzeagatik. Era berean, Espainiako Estatuari NBEren ebazpenen eta Nazioarteko Zuzenbidearen araberako irtenbide politikoa bilatzea eskatu diote, betiere sahararren erabakitzeko eskubidea errespetatuta.
Komunikabide batzuen arabera, Pedro Sanchezek gutun bat bidali dio Mohamed VI Marokoko erregeari, herrialdeak 2007an Sahararako egin zuen autonomia- erregimenaren proposamena gatazka konpontzeko proposamenik «serioena, errealistena eta sinesgarriena» dela esanez. Horren aurrean Abdulah Arabik, Fronte Polisarioak Espainian duen ordezkariak, hurrengoa adierazi du: Espainiako Gobernuak urteak daramatzala “Marokori etengabe atsegin ematen saiatzen”, deskolonizatzeke dagoen lurralde bateko “potentzia administratzaile” gisa ez dagokion “anbiguotasunarekin”. Ordezkariak erreferendum lotesle bidezko irtenbide politikoa proposatu du.
