[Galeria] Ander Imaz da beraien txapelduna
Pilotari oiartzuarrak Binakako Txapelketako finala galdu arren, senide, lagun eta herrikideekin batera ospatu zuen finala jokatu izana.
Ez zen posible izan. Ander Imaz pilotari oiartzuarrak, Unai Lasorekin batera, Binakako Txapelketa jokatu zuen atzo. Partidaren lehen zatian bikain aritu ondoren, txakalaldia izan zuten urdinez jantzita zeudenek. Bizkaia pilotalekuan zeuden oiartzuarren animoek ez zuten irabazteko balio izan, Jokin Altunak eta Julen Martijak eraman baitzuten txapela.
Ander Imaz bururik jantzi gabe bueltatu zen Bilbotik. Hala ere, txapela eskuratu balu bezala ospatu zuten 145 lagunek, Egi Luze sagardotegian. Imaz asko hunkitu zen hainbeste jende ikustean.
Gaueko menua, baina, ez zuten sagardoak, txuletak eta bakailaoak bakarrik osatu. Oiarpeko pilotariek —bertako harrobiaren fruitu da— harrera egin zioten, eta ondoren Alaitz eta Maiderren musika lagun, kalejiratxoa egin zuten. Izan ere, musikari oiartzuarren fan da pilotaria, eta haiek pieza batzuk jo zizkioten.
Barruan, Eñaut Fernandezek Agurra dantzatu zion, eta Esteban Martiarena eta Mikel Leonetek bertso batzuk eskaini zizkioten.
Imazek berak mikrofonoa hartu zuen ondoren. Eskerrak eman zizkien senide, lagun, zale eta oiartzuarrei oro har, eta iragarri zuen saiatuko dela final gehiago irabazten. Animo oihuekin erantzun zioten entzuten ari zitzaizkion hamarnaka lagunek.
Ondoren, afaritarako txanda izan zen. Horko argazkiak, badaezpada, ez ditugu igoko…
[Argazkiak Joxemi Lopezek atera zituen. Grabagailua ere eraman zuen, eta Oiartzun Irratirako erreportaje bat egin. Igo dute irratiaren webgunera].