Orereta Ikastolako udalekuetan izena eman daiteke
2 eta 12 urte bitarteko gazteei bideratzen zaizkie, ekainaren 27tik uztailaren 15era izango dira, eta izena emateko azken eguna maiatzaren 6a da.
Orereta Ikastolak antolatutako udalekuetan izena eman daiteke dagoeneko. Udaleku horiek 2 eta 12 urte arteko gazteei zuzendutakoak dira, eta nahi duten familia guztiek (ez ikastolakoak bakarrik) eman ahal izango dute izena maiatzaren 6a arte.
Udalekuak ekainaren 27tik uztailaren 15era izango dira goizeko ordutegian, 08:00etatik 13:00era. Bi urteko haurrak Orereta Ikastolak Esmalterian duen egoitzan egongo dira, eta gainontzekoak, berriz, Añabitarten.
Udaleku horiekin, Orereta Ikastolak oporraldian ere aisialdirako aukera euskalduna eskaintzea eta hori hezkuntza formalaren osagarri izatea nahi du. Bi urteko haurrak izan ezik, gainontzekoak Añabitarten egongo dira, espazio berdez inguratutako eta azpiegitura onez hornitutako gunean.
Horrez gain, bi urteko haurrentzako udaleku eskaintza bakarra da Orereta Ikastolarena herrian. Ikasturtean zehar adin horretako haurrekin egoten diren ikastolako hezitzaileak izaten dira haien begiraleak.
Interesdunek Orereta Ikastolako webgunean aurkituko dute udalekuen eta izen emateen gaineko informazioa.