Hogei hondakin poltsa atera dituzte Altzateko igerilekuaren ingurutik
Basolan taldeak hainbat lan burutu ditu apirilean, eta Altzateko igerilekuaren eremuan 300 kilogramo hondakin bildu berri dira.
20 hondakin poltsa bildu dira. Basolanak egiteko udalak kontratatutako taldeak bere azken lanak burutu ditu apirilean zehar. Basolan talde hori Altzate igerilekuaren inguruan ibili da lanean, linea elektrikoaren azpian eta aparkalekuko hesiaren atzealdean. Bi eremu horietan sasi garbiketa eta zabor bilketa egin dira, eta guztira 20 hondakin poltsa inguru bildu dituzte, hau da, 300 kilogramo inguru jaso dira guztira.
Lan horiek eginda, udalaren helburua da eremua txukun mantentzea, eta horretarako hesia konpontzeko beharra dagoela ikusi da.
Oarsoaldearen laguntzarekin kontratatutako lan talde horrek hainbat lan burutu ditu Lezon, hala nola, lur eremu publikoetan sasi garbiketa, zabor bilketa eta landaketak. Lan horien helburua eremu horien egoera hobetzea izan da, zaborra jasoaz eta bertako landaretza berreskuratuz.
Apirila bukaeran Altamirako parkean ibiliko dira eremu berdeen mantenu lanak egiten.
