Euskal Herriko Bakarkako Sega Ligaxkaren jardunaldi bat jasoko du Oiartzunek
Lehian parte hartu nahi dutenek dagoeneko izena emateko aukera dute. Ekainaren 18ko jardunaldia jasoko du herriak, hirugarrena hain zuzen.
Jon Otegi, Altzon, jo eta ke lanean. Aurten ere Azkartasuneko Euskal Herriko Sega Ligaxka antolatu du Almitza sega elkarteak, eta jardunaldietako bat Oiartzunek jasoko du, ekainaren 18koa hain zuzen. Aurretik beste bi jardunaldi jokatuko dituzte, Basaburuan (Nafarroa) eta Altzon (Gipuzkoa).
Heldu, gazte eta haurrek parte hartu ahal izango dute ligaxkan, emakume zein gizonezkoek. Kategoriaren araberako belar sail bat ahalik eta azkarren eta txukunen moztu beharko dute segalariek. Epaileek lanaren txukuntasuna aztertuko dute, eta honen baitan denbora zigorrak erantsiko dituzte. Hau da, denbora zigor hori saila mozteko behar izan duten denborari gehituko zaio.
Emakumezko helduek 35 metro koadroko azalerako saila moztu beharko dute; gizonezkoek aldiz, 100 metro koadrokoa. Gaztetxo eta haurren lanak izen emateen baitan zehaztuko dira.
Izena emateko aukera dagoela jakinarazi berri du elkarteak, 677 09 58 64 telefono zenbakira deituta, edo helbide honetara idatzita.
