"Euskarak denok edertzen gaitu"
Oarsoaldeko Euskara Batzordeak, lau udalekin batera, estetika establezimenduetan euskararen erabilera sustatzeko kanpaina abiarazi du.
Trintxerpeko Naiu estetika zentroaren aurrean egin dute gaur aurkezpena. 
Oarsoaldeko estetika establezimenduetan euskararen erabilera sustatzeko kanpaina abiarazi du Oarsoaldeko Euskara Batzordeak, eskualdeko lau udalekin elkarlanean. Gaur eguerdian egin dute agerraldia arduradunek, Trintxerpeko Naiu estetika zentroaren aurrean, urtebeteko ekintzak aurkezteko.
Euskaraz ederrago titulupean aurkeztu duten egitasmoarekin bat egiten duten zentroek (46 dira jada), edo aurrerantzean egiten dutenek, honako onura hauek jasoko dituzte:
- Egutegia. Hilaren 19tik uztailaren 27ra bitarte, euskarazko hitz bat ikasteko aukera izango dute euskaraz ez dakiten merkatariek, eta estetikarekin loturiko esaera bat ikasteko aukera euskaldunak direnei. Horretarako, 100 egun, 100 hitz egutegia jasoko dute.
- Lanpasa. ‘Euskaraz ederrago!’ leloa daraman lanpasa bana jasoko dute parte hartzen duten establezimenduek, sarreran jartzeko.
- Bezeroentzako oparia. Urriaren 15etik aurrera establezimendu horietan euskaraz egiten duten bezeroei ispilu-orraziak emango dizkiete opari.
- Itzulpenak. Otsailetik gaur arte, atxikitako establezimenduek jendaurrean dituzten idatzi eta oharrak euskaraz jartzeko doako laguntza jaso dute (itzulpenak, maketazioa, paisaia linguistikoa euskalduntzeko euskarriak, aholkularitza teknikoa…).
- Hiztegia. Horrezaz gain, estetika alorreko hiztegitxoa ere banatu zaie.
Loreto Osa, Pasaiako Euskara zinegotzia, Eneko del Amo, Errenteriako Garapen Ekonomikoko zinegotzia, Josu Delgado, Oiartzungo Euskara zinegotzia, Maika Martin, Errenkoaldeko ordezkaria, Sebastian Galardi, Itturriren ordezkaria, Maite Martin, Laurak Bateko ordezkaria eta Edurne Mitxeo, Lezokoak elkarteko ordezkaria izan dira gaurko agerraldian. Gonbidapena egin diete haiek udalerriko establezimenduei, iniziatibarekin bat egiteko.
