Garraio publikoaren tarifak merkatzeko eskatu dute EH Bildu eta PSE-EEk

Prezioak jaistea, zaurgarrientzako deskontu tarte berriak sortzea eta motora urtea bukatu baino lehen Mugi sisteman txertatzea galdegin dute.

PSE-EE eta EH Bilduk elkarrekin aurkezturiko mozioa aurrera atera zen atzo arratsaldeko udalbatzarrean.

Atzo arratsean egindako osoko bilkurako eztabaidagai nagusien artean izan zen garraio publikoa, horren gaineko bi mozio aurkeztu baitzituzten, batetik, PSE-EE eta EH Bilduk elkarrekin, eta EAJk bestetik.

Aurrera atera zen bakarra lehena izan zen, bi alderdi sinatzaileen aldeko botoekin, Ahal Dugu-Podemosen abstentzioarekin, eta EAJren kontrako bozkarekin. Dokumentu horrekin, Gipuzkoako Garraioaren Lurralde Agintaritzari (GGLA) hainbat eskaera egingo dizkiote. Horratx:

  • Tarifak. Tarifen balizko jaitsiera bat aztertzea, eta gutxienez aurten eta 2023an egungo tarifetako prezioei eustea.
  • Laugarren tartea. Deskontuak hobetzea, laugarren tarte bat sortuz “bereziki kalteberak” diren kolektibo berriekin.
  • Leheneratzea. Pandemiaren eraginez ezabatutako zerbitzuak berreskuratzea.
  • Renfe. Renferen aldiriko tren zerbitzuen egungo egoera “arintzea”.
  • Motora. Pasaiako motora zerbitzuan Mugi txartela txertatzea urtea bukatu aurretik.

Aipaturiko neurriak martxan jartzeak suposa dezaken gainkostua Foru Aldundiak bere gain har dezala nahi dute sozialista eta bilkideek. Proposamen horrek legearen bermea duela argi utzi zuten, 1/2011 Foru Arauak agintzen baitu Errepideen Foru Sareko bidesarien bidez bildutako diruaren zati bat horretarako bidera baitaiteke.

EAJren mozioa, babesik gabe
Alderdi jeltzaleak herri barneko bidaietarako garraio guztietan hiribus tarifa ezartzeko mozioa aurkeztu zuen, eta kontra agertu ziren Pasaiako udalbatza osatzen duten gainontzeko hiru taldeak. Horietako bakoitzeko eledunek bozkaren zergatia azaltzeko tartea hartu zuten.
 
Julen Rodriguezek (Ahal Dugu-Podemos) zentzugabekeriatzat jo zuen proposamena, horren baitan jasota baitzegoen, Loreto Osak aurretik azaldu zuen bezala, Pasaiako herriaren barruko bidaiengatik tarifa berezi bat sortzea. “Horrelako neurri batek zentzua izango luke Errenteria edo Irun bezalako herri batean, non auzoen arteko garraioa ohikoa den”. Adibideak jarri zituen: “Ebidenteki, Donibanen frontoitik Pari Berrira joateko, edota Antxon, Prostetik Marea Altara iristeko inork ez du autobus bat hartuko”.
 
PSE-EEren izenean mintzatu zen Lore Suarez gero, Rodriguezen bide beretik, dena den. “Mozioan egindako planteamendua apur bat ezinezkoa da une honetan”, iritzi zion, “ez deritzogu egoki ezta egingarri ere aurkezten den aukerari”.
 
Iraitz Pazos bilkidea zalantzati agertu zen: “Zenbat dira herri barneko garraio horren ohiko erabiltzaileak? Kuantifikatu dituzue? Zein motatako pertsonak dira? Pertsona helduak badira, dagoeneko deskontu bat jasotzen ari dira. Bestetik: nork ordainduko luke aldaketa horrek suposatuko lukeen defizita? Aldaketa honek desitxuratuko luke momentu honetan dugun tarifen sistema osoa”.
Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.