PSE-EEk kezka agertu du delituen gorakada dela eta
Udal gobernuko informazio eta gardentasun eza salatu dute sozialistek, eta borondatea eta konpromisoa eskatu diote alkateari.
Udaltzaingoaren eraikina, Errenteria-Oreretan. PSE-EEren arabera delinkuentziak gora egin du azken urtean Errenteria-Oreretan. Ertzaintzaren urteroko memoria oinarri hartuta, 2021ean delituen gorakada herrian %19,14koa izan dela salatu du talde sozialistak. Iturri beraren arabera, kontrako joera da Euskal Autonomi Erkidegoan eta Gipuzkoako Lurralde Historikoan ematen dena, izan ere %8,14 jaitsi da EAEn, eta ia %3 Gipuzkoan.
Ertzaintzaren datuen arabera familia arteko tratu txarrengatik jasotako salaketen kopurua %91 hazi da, etxean indarrez egindako lapurreten delituak %71,43 igo diren bezala. Iruzurren kopuruak ere gora egin du, kasu horretan %12,75.
Isaac Palencia bozeramalearen esanetan egoeraren berri ematea ezinbestekoa da arazoa konpontzeko, eta EHBilduk egoera txikiagotu nahi duela salatzen du. Era berean, udal gobernuko komunikazio eta informazio ezaz kezkatuta ageri da PSE-EEko bozeramalea.
Egoera konpontzeko asmoz, Udaltzaingoaren bete gabeko plaza guztiak betetzea, Gizarte Zerbitzuak indartzea, Emakumeen Etxearekin elkarlana hobetzea eta kalean poliziaren presentzia handitzea proposatzen du Isaac Palencia PSE-EEko bozeramaleak.
