Mendebaldeko Sahararen aldeko jarrera hartu du udalbatzak
Espainiako Gobernuaren jarrera aldaketa salatzeko mozioak EHBilduren, EAJren eta Elkarrekin Podemos-IU taldeen babesa jaso zuen. PSE-EEk, ordea, aurka bozkatu zuen.
Errenteriako udalbatza, asteartean. Errenteriako udaletxean udalbatzarra egin zuten asteartean, eta Mendebaldeko Sahararen aldeko mozioak bereganatu zuen protagonismoa talde politikoen interbentzioetan. Horren aurretik, bestelako gaiak landu zituen udalbatzak, horien artean udaleko aurrekontu orokorren likidazioa, 2022ko ordenantza fiskalen 2. aldaketa eta Haur Hezkuntzako Beraun Berri (Aldakoenea) eraikinaren desafektazioa.
Luzerako jo zuen, ordea, Mendebaldeko Saharari elkartasuna adierazteko EH Bilduk eta Elkarrekin Podemos-IUk aurkeztutako mozioak. Testuan, Espainiako Gobernuaren jarrera salatu eta NBEren akordioak errespetatzea eskatzen zen. Bide batez, elkartasuna adierazten zitzaion Mendebaldeko Saharako herritarrei.
EH Bilduk, EAJk eta Elkarrekin Podemos-IUk mozioaren alde bozkatu zuten. EH Bilduk Saharak duen autodeterminazio eskubidea errespetatzeko eskatu zuen, eta bat egin zuen Fronte Polisarioarekin. Espainiako Gobernuak hartutako erabakia nazioarteko erakunde guztien ebazpenen aurka doala ere salatu zuen. EAJk Pedro Sanchezen gobernuak nazioarteko legedia goitik behera urratu duela azpimarratu zuen, eta Espainiako Gobernuak interes ekonomikoak saharar herriak dituen eskubideen gainetik jarri dituela salatu zuen. EAJko bozeramaile Eli Muruaren arabera, garai txarrak dira eskubideentzat, herrien askatasunerako eta eskubide demokratikorako. Elkarrekin Podemos-IUko Maite Gartziak nazioarteko legedia betetzea eskatu, Espainiako Gobernuko jarrera salatu eta Saharako Herriaren autodeterminazio eskubidea defendatu zuen.
PSE-EE alde bozkatu ez zuen alderdi bakarra izan zen, eta mozioaren kontrako bozkaren argudioak Isaac Palencia bozeramaileak eman zituen. Talde sozialistaren aburuz, bi aldeen arteko elkarrizketak eta akordioak ekarriko du gatazkaren konponketa. Espainiako Gobernuak hartutako erabakiarekin konponbidea gertuago egon daitekeela uste dute.
