Sanjuandarrak Espainiako Txapeldunak jubenil kategorian
Espainiako Batel Txapelketa Pasai Donibanen jokatu izan arren ez zen euskaldun partaidetza handirik izan. Sanjuandarrak Oarso-bidasoko ontzi bakarrak izan ziren.
Argazkia: San Juan Koxtape Arraun Elkartearen facebook-etik hartua. Asteburu bikaina izan da San Juan-Pasai Donibane Koxtape A.E. elkartearentzako. Jubenil kategorian, neska-mutilak Espainiako Txapeldun izan baitziren etxeko uretan. Biak ala biak 2.000metroko estropadak burutu zituzten, lau luzeetara, hiru ziaboga emanez. Igandeko finaletan, larunbateko sailkapen estropadetan baino haize eta korronte gehiago izan arren, estropada bikaina burutu zuten sanjuandar arraunlari gazteek. Oro har, ez zen euskaldunen partaidetza handirik izan finaletan, eta sanjuandarrak Oarso Bidasoko ontzi bakarrak izan ziren.
Nesken kasuan, 09:59,17ko denborarekin irabazi zuten finala. Lehia oso estua izan zen. S.D.R. Kaikuri tosta bateko aldea atera zioten. Hirugarren sailkatuari (Isuntza A.E), aldiz, ia 6 segundoko aldea. Lekeitiarrak estropada haustera irten iren, baina sanjuandarrak eraso horri eutsi eta bigarren ziabogan harrapatu egin zituzten. Hirugarren ziabogara lekeitiarrak, sestaoarrak eta sanjuandarrak batera heldu ziren. Baina arrosek azken luze bikaina egin eta lehen postuan amaitzea lortu zuten.
- Denborak: San Juan: 09:59,17; S.D.R.Kaiku: 10:00,14; eta Isuntza 10:04,92.
- Bateleko eskifaia: Haizea Garmendia Lekuona, Maddi Gereño Legorburu, Alaitz Urtizberea Gastañares, Eider Arraras Garmendia eta Laia Gereño Legorburu.
Mutilek, aldiz, erraz irabazi zuten estropada. Bigarren sailkatuari batel bateko distantzia atera zioten. Irteeran Itsasoko Amak aurrea hartu eta arrosak S.D. Samertolameu eta A.D. Castañaresekin batera iritsi ziren lehenengo ziabogara. Biraketa azkarra egin eta bi hauen aurretik irten ziren. Erritmo ona hartu, eta bigarren ziabogara lehenak heldu ziren, Itsasoko Amari aurrea hartuz. Une hartatik, bigarren sailkatuari gero eta tarte handiagoa ateratzen hasi eta sanjuandarrak ia lau segundoko tarte erosoarekin irabazi zuten.
- Denborak: San Juan: 09:06,14; Itsasoko Ama: 09:09,95; eta S.D. Samertolameu: 09:11,68.
- Bateleko eskifaia: Unax Errondosoro Lujanbio, Aritz Etxezarreta Casas, Asier Sanchez Barrado, Jon Escribano Sarasua es Iker Larre Bengoetxea.
Sailkapen eta denborak osorik ikusteko egin klik hemen.
