Pasaia Kayak hirugarren sailkatu zen larunbatean Zumaian lehiaturiko ur lasaietako norgehiagokan. Bakarkako lanetan ere fin aritu ziren.
Pasaia Kayakeko hainbat kide Zumaiako pantalanean proba bukatuta, kirol-jantzi berriak estreinatzen. 
Joan den asteburuan Zumaian lehiatu zen ur lasaietako piraguismoko Gipuzkoako Eskola Kirola programa barruko udaberriko bigarren proba, eta bertan izan zen, berriz ere, Pasaiak Kayak talde pasaitarraren ordezkaritza.
Gaizka Lopezen azkenaldiko emaitzek argi uzten dute sasoi onean dagoela gaztea, eta hori berretsi zuen azken lehian. Bigarrenari 14 segundoko aldea ateraz nagusitu zen Lopez, 13 minutu eta 45 segundoko marka aipagarria lortuz 3.000 metroko ibilbidean. Santigotarrak taldeko Cabezon izan zen hirugarrena, podiuma osatuz.
Oinatz Alonso taldekidea ere fin aritu zen Haurren B kategorian, zilarrezko domina erdietsiz. Gainerako taldekideen artean, aipatzekoa Kimuak B mailan Aitana Etxezortuk egindako lana, bigarren izan baitzen Urdaniz nafarrarengandik 3 segundora.
Top 10ean sailkatzea lortu zuten gainerako ordezkari pasaitarrak honakoak izan ziren: Ander Garcia (9., Kimuak A), Gorka Bravo (10., Haurrak A), Iraitz Izagirrea (4., Haurrak B) eta Oier Lucas (8., Haurrak B). Taldekide guztiek lortutako puntuei esker, Pasaia Kayak hirugarren izan zen taldekako sailkapenean, Itxas-Gain etxeko taldearen eta Santiagotarrak garailearen atzetik, hurrenez hurren.
Hilaren 22an Trintxerpen izango dute Gipuzkoako txapelketa. Dagoeneko buru-belarri ari dira prestatzen.
Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako. Herrigintza egin nahi dudalako. Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako. Zure ekarpena behar dugu, babestu tokiko euskarazko komunikabidea.
