Herriko erosketak "erraz, eroso eta erakargarri" egingo ditu ENARAk
Erosketak etxean bertan entregatzeko aukeraz ematez gainera, Euskalerria aparkalekuan jarri duten Kontsigna izeneko gailu batean jasotzeko aukera emango du zerbitzuak.
Euskalerria aparkalekuan jarri dute Kontsigna izeneko gailua, erosketak bertan jasotzeko. ENARA izeneko zerbitzu berria sortu dute Oiartzunen, “herriko merkataritza ikusarazteko eta laguntzeko” asmoz. Itturri elkarteak abiatu du proiektua, udalaren, jaurlaritzaren eta Dendartean elkartearen laguntzarekin. Erosketak “erraz, eroso eta erakargarri” egiteko zerbitzua dela azaldu dute gaurko aurkezpenean, eta batez ere lagungarri izango dela adinekoentzako, mugikortasun murriztua duten oiartzuarrentzako edota ordutegi zaila dutenentzako.
Zehazki, erosketak eramateko eta Whatsapp bidez saltzeko zerbitzu bikoitza da ENARA, “Oiartzungo bizilagunek benetako erosketa esperientzia izan dezaten”. Batetik, erosketak etxean bertan entregatzeko aukera eskainiko dute, eta bestetik, Euskalerria plazako aparkalekuan dagoen Kontsigna izeneko gailuan jaso ahal izango dira erosketak. Zerbitzua erabat doakoa izango dela azaldu dute gaurkoan.
Etxera eramateko egiten diren erosketak honako ordutegian jasoko dituzte herritarrek: astelehenetik ostiralera, 8:00etatik 12:00etara egindakoak 13:30etik 15:30era entregatuko dituzte, eta 12:01etik 18:00etara egindakoak aldiz, 19:00etatik 20:30era. Larunbatean soilik goizez egingo dituzte entregak etxean.
Whatsapp bidezko erosketa saltzaileari bidalitako mezu baten bidez aktibatuko da, merkatariak eskaera prestatu eta bezeroari jakinaraziko dio, eta bezeroak etxean, kontsignan edo etxean jaso ahalko du.
Oraintxe bertan herriko 11 establezimenduk eskaintzen dute zerbitzua. Lotura honetan kontsulta daitezke horiek, hemen jaso dute informazio guztia.
