Zirraraz betetako sasoi bukaera du aurretik Antxo AFren talde nagusiak
Beren ligako lider nabarmen dira antxotarrak, eta igoerako play offak jokatuko dituzte. Aldi berean Gipuzkoako eta Euskadiko kopak irabaz ditzakete.
Pescados Alberto Ferreres-Antxo AFren areto futbol klubaren talde nagusiak emozio handiko sasoi bukaera izango du. Maiatza behintzat oparo datorkio. Izan ere, Ligako (Espainiako 3. Mailan daude) azken lau partidak jokatuko ditu, eta Gipuzkoako nahiz Euskadiko kopetako finalerdiei eutsiko die. Zatika.
Ligari dagokionez, 3. Mailako hurrengo partida larunbatean jokatuko du (hilak 7) 18:30ean Gasteizen, bertako Aurrera Vitoria taldearen kontra. Kategoriako lider dira, nabarmen, antxotarrak: liga hori bukatzeko lau partida falta direla (etzikoa barne), 70 puntu dituzte zuri-gorriek, eta 63 bigarren den Laskorainek. Beraz, eskura dute lehen postua. Horrek esan nahi du 2. B Mailara igotzeko play-offean abantaila izango dutela. Hori dute Antxokoek aspaldiko ametsa, igotzea alegia, eta aurten esku-eskura dute.
Bestalde, Antxora bi kopa ekartzeko gai izan daitezke David Hidalgok zuzentzen dituen taldekoak. Gipuzkoakoaren eta Euskadikoaren finalerdietan daude. Aurki dituzte. Honakoak horien ordutegiak:
- Gipuzkoako Kopako finalerdia: hilak 11, asteazkena, 20:50an Donostiako Pio Baroja kiroldegian Antiguokoren kontra.
- Euskadiko Kopa, lauko finala, finalerdia: hilak 14, larunbata, 16:45ean Gasteizen Gernikaren kontra. Finalaurreko hori irabaziz gero, hilaren 15an jokatuko dute finala, Gasteizen bertan, 17:30ean.
