Mende erdia atzera egingo du Kexaldik, 50. urteurrena ospatzeko
Kexaldi Kultur Elkartearen urrezko ezteiak ospatzeko bi hitzaldi, bazkari bat eta astean zeharreko erakusketa antolatu dituzte.
Igandeko bazkaria izan ezik, gainontzeko jarduerak Kexaldiren egoitzan egingo dituzte. 
Kexaldi Kultur Elkarteak mende erdia beteko du aurten, eta urteurrena ospatzeko egitarau berezia prestatu dute kideek. Bi hitzaldi, bazkari bat eta astean zeharreko erakusketa egingo dituzte; azkenari dagokionez, ez dute oraindik xehetasunik eman, baina Kexaldiren egoitzan izango dela aurreratu dute antolatzaileek, datozen bi asteetan zehar.
Datorren asteartean, hilak 10, Txema Ruiz Etxeberriak hitzaldi-solasaldia emango du badiaren sorrerara atzera begirakoa eginez. Aurreratu dutenaren arabera, bitan banatuko du Ruizek saioa: Pasaiaren eta inguruaren sorrera eta garapena; eta Antxoren lehen urteak. Interesa duenak ateak zabalik topatuko ditu Kexaldin, 19:00etatik aurrera.
Hilaren 12an, ostegunarekin, Koldo Izagirre eta Josebe Gondatek hartuko dute hitza. Lehena Kexaldi sortu zeneko egoera politikoari buruz arituko da, eta Kexaldiren sorrera nahiz bilakaera historikoa hartuko du ahotan, bide horretan protagonistetako bat izandako Gondatek. Solasaldi hori ere 19:00etan izango da, Kexaldiren egoitzan.
Urrezko ezteien ospakizunari bukaera emateko, datorren asteko igandean, hilak 15, bazkari herrikoia egingo dute Ibaiondo pilotalekuan. Bizilagun guztiak gonbidatuta daudela esan dute antolatzaileek. Bertaratu nahi duenak txartela eros dezake, jada, Ibaiondo kantinan edo Axular tabernan, 30 euroren truke; erosketaren unean hautatu beharko da menua.
