Amaiurko erresistentziaren 500. urteurrenaren harira, hainbat jardunaldi Oiartzunen
Hainbat ekitaldi egingo dituzte ekainean. "Oraindik askok ukatu nahi duten eraso militarraz eta nafar herriak bere nortasuna, independentzia eta eskubideen aldeko erresistentzia borrokaz" ariko dira.
Aurten Amaiurko erresistentziaren 500. urteurrena beteko da, eta egun berezia biribiltzeko jardunaldi batzuk antolatu dituzte elkarlanean Trikuharri Kultur Elkarteak, Beloaga Bizirik-ek eta Oiartzungo Udalak, “1512an hasi zen konkista saio berria gogora ekartzeko” asmoz.
Antolatzaileen arabera, “oraindik askok ukatu nahi duten eraso militarraz” ariko dira jardunaldi horietan, eta bereziki “nafar herriak bere nortasuna, independentzia eta eskubideen aldeko erresistentzia borrokaz”. Horretarako, lehenik, hitzaldi bat eskainiko du Beñi Agirrek, 18 urteetan zehar luzatutako konkista eta deskonkista saiakeraz ariko da. Asisko Urmenetak aldiz, Amaiur! Libera State izeneko komikia aurkeztuko die bertaratutakoei. Horrez gain, Joxemari Iturriotzekin batera, Erdi Aroko Oiartzunera egingo dute bidaia oiartzuarrek, garai hartako hainbat leku esanguratsu bisitatuko baitituzte: Beloagako gaztelua eta Huarte leinu ganbotarraren dorretxearen kokalekua.
Jardunaldiek iraun bitartean erakusketa berezi bat ikusgai jarriko dute Arizmendi Enean. 14 panelez osatutako Habitat: ezkutatu diguten historia izeneko erakusketa bisitatzeko aukera egongo da, ekainaren 6tik 19ra hain zuzen. Besteak beste, Nafarroako Erresumaren gazteluak non zeuden azalduko dute.
Ondorengoa da jardunaldien egitaraua:
- Ekainaren 6an (astelehena): Jardunaldien aurkezpena eta erakustan bisita gidatua egingo dute, 19:00etan Arizmendin.
- Ekainaren 8an (asteazkena): 1512-1530: Nafarroako konkistara hurbilduz hitzaldia eskainiko du Beñi Agirrek, 19:00etan, Arizmendi Enean.
- Ekainaren 12an (igandea): Erdi aroko Oiartzundik ibilaldia: Beloaga eta Huarte izeneko bisita gidatua eskainiko du Joxemari Iturriotzek, 10:00etan hasita, Herriko Plazatik.
- Ekainaren 17an (ostirala): Amaiur! Libera State komikiaren aurkezpena Asisko Urmenetarekin, 19:00etan, Arizmendi Enean.
