EHko Pala Txapelketa, azken txanpan
Finalak jokatuko dituzte larunbat honetan zortzi bikotek, Madalensoron. 8:15an hasiko dute lehia.
Lertxundi eta Arruti Orioko bikotea Oreretako Eneko Arruabarrena eta Oiartzungo Ganix Berebideren aurka ariko da, hirugarren mailan. Girizia elkarteak antolatzen duen Euskal Herriko Pala Txapelketa Irekia azken txanpan sartu da, larunbat honetan (hilak 14) jokatuko baitituzte finalak. Zortzi bikote lehiatuko dira, Madalensoro pilotalekuan.
Finalak 08:15an hasiko dituzte. Lehenik, Lertxundi eta Arruti Orioko bikotea, Oreretako Eneko Arruabarrena eta Oiartzungo Ganix Berebideren aurka ariko da, gizonen hirugarren mailan.
Gizonen bigarren mailan, aldiz, Berako Mitxelena eta Garbisu bikoteak, Salegi zumaiarra eta Arrieta elgoibartarraren kontra jokatuko du.
Nesken mailan, Aiako Eizmendi eta Hernaniko Balerdi, Alegiko Agirre eta Altzoko Muruaren kontra ariko dira.
Gizonen lehen mailan, azkenik, Aizpurua eta Epelde azkoitiarren eta Elgoibarko Lizarralde eta Arrizabalagako Lizarralderen aurkako partida jokatuko da.
Finalen ondoren, txapelketan urtero parte hartzen duen Kristobal Gastesi Altzako pilotaria omenduko dute, orain hilabete gutxi zendu baitzen. Horrez gain, Josetxo Gamio Giriziako pilotaria presente izango dute, aurtengo edizioa haren omenez egin baitute. Bukaerako sari banaketan, udalaren ordezkariekin batera, Ander Imaz eta Ugaitz Susperregi izango dira.
