Eraikuntza enpresari gerrikoa estutzeko eskatu diote Arramendiko bizilagunek
Jaureguizarrek etekin handia lortu nahi duela, eta enpresak operazioa errentagarria ez dela esatea salatu dute kaltetuek.
Arramendi kalea, Errenteria-Oreretan. Arramendiko bizilagunek, Alokairu Benta Berri eta Stop Kaleratzeak elkarteekin batera, Errenteria-Oreretako 40 etxebizitzen jabea den Jaureguizarrei erantzun diote. Eusko Jaurlaritzako Etxebizitza Sailaren eta enpresaren arteko komunikatuen guda kritikatu dute kaltetuek. Alokatuen esanetan, instituzio publikoek 15.000 euroko laguntzak eskaini dizkiete bizilagunei, betiere eraikuntza enpresak 6319 Araua betetzen badu. Bizilagunen hitzetan, guztiz onartezina da enpresaren partetik esatea ezin duela aipatutako Araua bete errentagarritasuna aitzaki hartuta. Enpresak dio administrazio publikoak direla arazoari irtenbidea eman behar diotenak, eta Jaureguizar GKE bat ez dela gogoarazi du.
Bizilagunek gogor salatu dute eraikuntza enpresaren jarrera, eta Jaureguizarrek etekin handiagoa lortu nahi duela salatu dute. Bide batez, operazioa errentagarria ez dela esatea onartezina dela uste dute, eta Gipuzkoako Lurralde Historikoan Estatuko prezio altuenak daudela gogora ekarri dute kaltetuek. Azkenik, babestutako kontratuen aldeko jarraikotasuna eta kaleratzeen aurkako defentsa egin dute Arramendiko bizilagunek.
