Lintzirin inguruan obrak egingo dituzte, hiru asteburuz
Obrek GI-636 errepidean aldaketa ugari eragingo dituzte. Hiru kilometro baino gehiagoko zorua birgaituko dute.
GI-363 errepidearen hiru kilometro baino gehiagoko zorua birgaitzeari ekingo diote asteburu honetan, eta hiru asteburuz luzatuko dituzte lanak. Lintziringo biribilgunearen eta Oliden kanpinaren irteeraren artean egingo dituzte obrak. Lanek ostiraleko 21:00etatik hilaren 22ko (igandea da) 22:00etara arte iraungo dute. Trafiko handiko errepidea denez, auto ilarak espero dituzte inguruan, beraz, ibilbide alternatiboa erabiltzeko gomendatu du aldundiak.
Ostiraletik larunbatera (21:00etatik 21:00etara) Donostiako noranzkoan erreiaren zorua birgaituko dute, ondorioz, epe horretan ezingo da bide hori erabili. Bidaso ingurutik datozen erabiltzaileak GI-2638 errepidetik joan beharko dira, Gaintxurizketako biribilgunetik Lezorantz, eta Altamiratik GI-363ra jo. Lintzirin industriagunerako sarbidea GI-636 errepidetik egin ahalko da, baina ibilgailuen zirkulazioa geldoa izango dela aurreratu dute.
Irungo noranzkoan erreitik zirkulatzen ari diren gidariek normaltasunez egingo dute GI-636 errepidetik, eta Lintzirin poligonoaren bi ertzetarako sarbidea zabalik izango dute.
Hurrengo asteburua
Hilaren 21eko (larunbata da) 21:00etatik igandeko 22:00etara Irungo noranzko erreiaren zorua birgaituko dute, beraz, noranzko horretan zirkulatzen duten gidariek behin behinean ezarritako noranzkoaren kontrako erreitik zirkulatuko dute, eta obrek eragindako zatiko lanak amaitu ondoren, beraien erreira itzuliko dira. Industrialdearen ezkerraldean dauden eta establezimenduetarako sarbidea Larzabaleko biribilgunerako irteeratik egin beharko da, eta handik Lintziringo beheko biribilgunetik eta zerbitzugunetik. Industrialdearen eskuinean dauden establezimenduetarako ibilgailuen sarbidea aldiz, itxita egongo da larunbat gauetik. Ondorioz, Oliden kanpinetik eta ondoko etxebizitzetatik GI-636 errepidera sartu eta irten ahal izango da, 8:00etatik 12:30era.
Asteburu honetan bezalaxe, Bidasotik datozen gidariek GI-363 errepidetik jo beharko dute Gaintxurizketako biribilgunetik Lezora, eta Altamirako biribilgunetik jo GI-363ra. Donostiako noranzkoan aldiz, Lintzirinen sarbidea GI-363 errepidetik eta Makarraztegi poligonotik egin ahalko da.
Aldundiak aurreratu du asteburu osoan zehar txirrindulariek debekatuta izango dutela GI-363 errepidetik igarotzea, Lintzirinetik Gaitxunrizketara. Alternatiba gisa, Lezotik Gaintxurizketara doan GI-2638 errepidea erabiltzeko proposatu dute.
