"Oiartzunen, Euskal Herrian eta munduan zehar heteroarauaren kate estuak birrindu nahi ditugu"
Altzibargo pareta batean iaz agertutako esaldi LGTBIQ+foboaren gainean mural koloretsua margotu berri dute. Atzo inauguratu zuten, Homofobiaren, Bifobiaren eta Transfobiaren Aurkako Nazioarteko Egunean.
Atzoko Homofobiaren, Bifobiaren eta Transfobiaren Aurkako Nazioarteko Eguna probestu zuten Altzibar auzoan egindako mural berria inauguratzeko. Iaz pareta horretan margotutako esaldi aldarrikatzaile batek eraso LGTBIQ+foboa jasan zuen, eta hori salatzeko kolorez eta aldarrikapenez bete dute Olalde etxadi inguruko pareta oso bat. Udane Ansa Iragorri oiartzuarrak egin du diseinua, eta honako esaldia irakur daiteke: LGTBIQ+ fobiarik? Ez, eskerrik asko!.
Gizartea eta sistema “pertsonak modu bakar batean izan eta maitatzeko deisinatuta” dagoela salatu zuten lehenik, eta hortik ateratzen diren “gorputz, identitate eta desira motak zigortuta” jarraitzen dutela. “Heteroarauak esaten digu zer gustatu behar zaigun eta zer ez, zein gustatu behar zaigun eta zein ez, zer praktika sexual gustatu behar zaizkigun eta zein ez. Esaten digu pertsona bakarra gustatu behar zaigula eta bizitza osorako izan behar duela, esaten digu familia egitura bat osatzera bideratutako desioa izan behar dugula… Nolabait, bide bat markatzen digu. Gure ibilbide afektibo sexuala baldintzatu eta erregulatzen du, eta identitate lesbiana, gay, trans, queer eta abarrak bazterrean uzten ditu”, esan zuten amorruz.
Nahikoa dela oihukatu zuten bertaratutakoek, Oiartzunen eta Euskal Herri osoan “heteroarauaren kate estuak birrintzeko” premiaz aritu ziren. Eta horretarako, “tratu onaren bidetik, desberdintasunak balioan jartzearen bidetik, ahizpatasunetik, bizipozetik, babesetik, elakrtasunetik, maitasunetik, eskubideetatik, ikusgarritasunetik, aniztasunetik eta errespetutik” jotzeko beharra nabarmendu zuten. Hitz hauek “aske bizi eta aske maitatu nahi dugunon iparrorratz” izango direla erantsi zuten, Oiartzun “koloretsuago eta anitzagoa” eraikitzeko beharrezkoak, “izateko eta maitatzeko modu guztiek kabida izango duten herri bat eraikitzeko”.
Atzo inauguratutako muralak iaz jasandako erasoa ere gogoratu zuten, haserre. Mural horretan Bizitza motzegia da heteroa izateko esaldia margotu zuten iaz, eta handik gutxira aldaketa bat egin zion norbaitek, mezu LGTBIQ+fobikoa idatziz: Bizitza motzegia da LGTB+ izateko. Handik gutxira esaldiari bira eman zioten, eta hauxe idatzi zuten: Bizitza motzegia da LGTB+foboa izateko. Orduan, sare sozialetan norbaitek pintaden harira honakoa idatzi zuela azaldu zuten atzo: LGTB+foboak eta heterofoboak, biak oker. Azken mezua “oso tranpatia” dela adierazi zuten atzoko ekitaldian, “heterofobia ez baita existitzen. Pertsona heteroak ez ditu bere giza eskubideak kolokan ikusten nahi duena maitatzeagatik eta are gutxiago marginaziorik pairatzen. Zapalduta dauden kolektiboek ahotsa altxatzen dutenean deseroso sentitzen denak badauka zer hausnartua”, erantsi zuten.
Azkenik, datozen hiletan egingo dituzten bi egitasmoetara deitzeko ere probestu zuten atzokoa. Batetik, Oñatin ekainaren 11 eta 12an egingo duten Topaketa Feministara deitu zituzten oiartzuarrak; eta bestetik, ekainaren 25erako antolatzen ari diren Harrobira, Oarsoaldeko Transmaribollo Bizikleta Martxara.
