[Kartelerarekin] "Urteko partida garrantzitsuena" du gaur Jaixkik
Gipuzkoako 2. Mailara Igotzeko play-offean, itzuliko partida dute gaur lezoarrak Ibarran: joanekoan 2-1 irabazi zuten.
Hil ala biziko partida du gaur Jaixki Areto Futbol taldeak. Gipuzkoako 2. Mailara igotzeko play-offaren itzuliko partida dute lezoarrek, 21:45ean hasita Lauburu Ibarra taldearen kantxan. Joaneko partidan 2-1 irabazi zuten lezoarrek; beraz, abantaila hori defendatzea, eta ahal bada irabaztea dagokie igoera lortu nahi badute.
Zaleei deia egin diete Jaixkikoek. Erantzuten ari dira: jada autobus oso bat bete da gaur Ibarra aldera joateko, eta ziur haien kabuz beste lezoar asko ere joango direla taldekideak animatzera. “Aurreko igandean lortutako emaitza ona izan arren, lana oraindik ez dago egina. Taldeak daukan guztia emango du, igoera lortu nahi dugu eta horretarako zuen laguntza ezinbestekoa da”, esan dute kirolariek.
Bestelakoan, nabari da kirol ligen sasoia bukatzear dela. Apala da Lezoko bestelako kirol taldeen kartelera. Honakoak dira partidak:
FUTBOLA
Gizonen Erregional Ohorezko Maila
- Aretxabaleta-Allerru, etzi (igandea) 16:30ean Aretxabaletako Ibarra zelaian.
Gizonen Gazte Maila, Igoera Fasea
- Allerru-Internacional, bihar (larunbata) 11:00etan Plazetan.
Alebinak eta Benjaminak
- Bihar, larunbata, klubeko alebinen bi taldeek eta benjaminen hiruek partidak izango dituzte goizean zehar plazetan.
ESKUBALOIA
Neska kadeteak
- Munttarpe-Urnieta, etzi (igandea) 11:15ean Bekoerrota kiroldegian.
ARETO FUTBOLA
Gipuzkoako Hirugarren Maila, igoerako play-offa
- Lauburu Ibarra-Jaixki, gaur (ostirala) 21:45ean Ibarrako Belabieta kiroldegian.
