San Pedroko plaza berria inauguratu dute
Azken fasearen amaierarekin 3.000 metro koadroko espazioa irabazi dute sanpedrotarrek. Lanen kostua ia 2 milioi eurokoa izan da. Gipuzkoako Foru Aldundiak %77 finantzatu du, eta %23 Pasaiako Portu Agintaritzak.
Ezkerretik eskuinera, hurrenez hurren: David Candelario (Pasaiako Portu Agintaritzako zuzendaria), Loreto Osa (Pasaiako Udaleko hirigintza zinegotzia), Joakin Telleria (Pasaiako Portu Agintaritzako presidentea), Ricardo Ugarte (eskulturaren sortzailea), Markel Olano (Gipuzkoako Ahaldun Nagusia), Izaskun Gómez (Pasaiako alkatea) eta Rafaela Romero (Mugikortasuneko eta Lurralde Antolaketako Foru Diputatua). San Pedrok espazio berria izango du bihartik aurrera. Gaur inauguratu dute lonja ondoan dagoen plaza berria. Inaugurazio ekitaldira Pasaiako Udaleko zein Gipuzkoako Foru Aldundiko eta Pasaiako Portu Agintaritzako agintariak gerturatu dira. Lanen kostua ia 2 milioi eurokoa izan da. Aldundiak %77 finantzatu du, eta Portuak %23.
Zonaldea orain arte portukoa zen, eta herritarrek ezin zuten erabili. Gaurtik aurrera, sanpedrotarrek 3.000 metro koadroko espazioaz gozatzeko aukera izango dute. 2021ean ireki zituzten plazako lehenengo 2.000 metro koadro. Horiei gaur beste 1.000 metro koadro gehitu zaizkie. Gainera, lonjaren estalkiaren obrak amaitu ondoren, harmaila horretatik estalkira igotzeko bidea izango da. Bestetik, hitzarmen bat sinatuko dute Portu Agintaritzak eta Pasaiako Udalak espazioaren kudeaketa udalarena izan dadin.
Pasaiako alkatea Izaskun Gomezek Pasaiako biziberritze urbanoaren, ekonomikoaren eta sozialaren aldeko aurrerapausoa dela nabarmendu du, eta hiriaren eta portuaren arteko elkarlanari eustea eskatu du. Bere ostean, Joakin Telleria Pasaiako Portu Agintaritzako presidenteak hartu du hitza hirugarren faseari buruz hitz egiteko. Fase honetan estalkiaren lanei ekingo diete.Telleriaren esanetan, uda ondoren egingo dute esleipena, eta lanen kostua Gipuzkoako Foru Aldundiak, Eusko Jaurlaritzak eta Pasaiako Portu Agintaritzak ordainduko dute. Instituzio bakoitzak heren bat ordainduko du hain zuzen ere.
Jarraian, Gipuzkoako Ahaldun Nagusia den Markel Olanok hitz egin du, eta plazaren inaugurazioa San Pedroko herritarren bizi-kalitatea hobetzeko baliogarria izango dela defendatu du. Bide batez, hurrengo urtetan Aldundiak zonaldeko hiru proiektuetan 64 milioi baino gehiago inbertituko dituela jakitera eman du. Trintxerpeko Adinberri, San Pedroko lonjaren estalkia eta Herrerako pabiloien egokitzapena dira aipatutako hiru proiektu horiek. Egingo diren inbertsioen bitartez espazio eraldatuko da, eta aktibitate ekonomikoa eta gizarte zerbitzuak indartuak aterako dira Olanoren aburuz.
Ricardo Ugarte, plazako Blas de Lezoren omenez egindako eskulturaren sortzailea, ekitaldian izan da, eta bere zirrararen berri eman du: “Hemen atzean dagoen San Pedro elizan bataiatua izan zen Blas de Lezo, ni bezala. Herrikide baten partetik beste herrikide batentzako sortu nuen eskultura”.
