Kontzentrazio zaratatsua egin dute etxez etxeko langileek
Aste osoan burutuko dituzten ekintzetatik lehenengoa izan da gaurkoa. Hitzarmen propioa aldarrikatu dute udaletxearen aurrean egindako protestan.
Pasaiako udaletxearen aurrean egin dute kontzentrazioa etxez etxeko langileak. Etxez etxeko langileek gaur hasi dituzte aurreikusita zituzten protestak. Pasaiako udaletxearen aurrean burutu dute lehenengo kontzentrazioa goizeko 11:00ak zirela. Pasaiako etxez etxeko langileek hitzarmen propioa eskatzen dute, eta horrela jakitera eman dute goizean egin duten elkarretaratzean. Kontzentrazio zaratatsua izan da, eta kartel ezberdinak ipini dituzte jakinaraziz kaltetutakoak “emakume prekarioak” direla. Bide batez, greba hasten dutela jakinarazi dute. Esku orriak ere bota dituzte “SAD Pasaia emakume prekarioak gara”, “SAD Pasaia udaletxea, non zaude?” eta “SAD Pasaia hitzarmen propioa orain!” esaldiekin.
Pasaiako etxez etxeko langileek borrokan jarraituko dutela aditzera eman zuten hasieratik, eta hurrengo egunetarako ekintza ezberdinak antolatu dituzte. Bihar EULEN enpresaren aurrean kontzentrazio zaratatsua egingo dute (enpresa horren bitartez kontratatzen ditu udalak langileak), eta asteazkenean manifestazioa egingo dute alkateordetzatik San Pedroko frontoiraino. Bi ekintzak goizeko 11etan izango dira.
