[Argazki galeria] "Udazkenean indar handiarekin bueltatuko gara"
Hileko lehen astelehena izanik, herriko kaleak aldarrikapenez bete ditu gaur Duintasunak. Udan atsedena egingo dutela jakinarazi dute.
Eguraldi txarrak ez ditu herriko pentsiodunak gelditu, eta hileko lehen astelehenetan bezalaxe, mobilizazio jendetsua egin dute gaur (hilak 4) herriko kaleetatik. Udaletxe parean bildu dira, eta ondoren, ohiko ibilbidea egin dute, Duintasuna elkarteak deituta.
Lehenik eta behin, Pentsiodunen Bizikleta Martxaren gaineko balorazioa egin du Duintasunak. “Ikaragarria izan zen lagun hauek egindakoa, 13 etapatan 700 kilometroko ibilbide zaila osatu baitute”, esan dute. Hiru aldarri nagusirekin abiatu ziren bizikletan, honakoak: gutxieneko pentsioa 1.080 eurokoa izatea, zerbitzu publikoen defentsa eta zaintza lana partekatuak.
Borrokan tinko jarraitzeko asmoa adierazi dute gaurko mobilizazioan, “pentsioen erosteko ahalmena bermatzeko KPI errealaren igoeraren arabera, baita azken urteotako pentsioen erosteko ahalmenaren galera konpentsatzeko ere eta pentsio publiko duinak, bidezkoak eta behar bestekoak bermatzeko”. Orain arte 60.726 sinadura bildu dituzte pentsiodunek Hego Euskal Herrian, eta haien asmoa da urri bukaeran Diputatuen Kongresuan aurkeztea guzti horiek, “pentsiodunen ekintza garrantzitsu batek lagunduta”. “Ezin dugu amore eman honetan ezin ahaztu baitugu Madrilgo Gobernuak indarrean jarri nahi duen Errenten Itunak, beti bezala, pentsioen eta soldaten balio-galera ekarriko duela, patronalaren eta finantza-kapitalaren aldetik inolako konpromisorik gabe”.
Bestetik, jaurlaritzari 1.080 euroko gutxieneko pentsioak osatzeko eskaera egingo diete pentsiodunek, Legebiltzarrean ponentzia bat sortzeko proposatuko baitute, “gure pentsioen murrizketak eta mehatxu berriak gelditzeko neurriak hartu ditzaten”.
Uda pasa eta gero borrokarekin jarraitzeko asmoa adierazi dute. Izan ere, salatu dute Jose Luis Escriva ministroak erreformen bigarren atala martxan jarri nahi duela, pentsioaren kalkulua egiteko kotizazio epea 25 urtetik 35era arte luzatuz. Azkenik, Madrilgo Kongresuan pentsio publikoak pobretu eta pribatizazioari ateak irekitzen dizkion Enplegu pentsio-planak sustatzeko joan den hil hasieran onetsitako lege proiektua garatzen saiatuko direla salatu dute, “gure ahaleginaren kontra”.
Horregatik, udan atsedena hartuko du Duintasunak, eta udazkenean “indar handiarekin bueltatuko” direla jakinarazi dute.
