[Erreportajea] Heziketarik gabe, aisialdia ez delako hain dibertigarria
Herriko hainbat sortzaileren izena daramate aurtengo udalekuetako taldeek. Haurrekin saio bereziak egiten ari dira, «haien barruan zerbait pizteko» asmoa baitu Abaraxka ludotekak.
Arnaizek eta Beratarbidek batera eskaini dituzte saioak, Ehuntze espazioan. Goiz dibertigarria pasatzeaz gainera, sorkuntzaren mundura gerturatzen ari dira egunotan herriko haurrak Abaraxka ludotekari esker. Ohiko aisialdi eskaintzaz gainera, herriko hainbat sortzailerekin hartu-eman berezia izaten ari dira aurtengo udalekuetan. Talde bakoitzari sortzaile baten izena jarri diote, eta diziplina horietako asko gertutik ikusi eta ikasten ari dira ia 400 haur.
Ongi pasatzea, baina ikasten. Jomuga hori dute Oiartzungo udalekuek. Urtero lanketa berezia egiten dutela kontatu du Abaraxkako Nekane Martiarenak. «Ez dugu ulertzen aisialdia heziketarik gabe. Saiatzen gara ongi pasatzen, baina beti heziketa puntu batekin».
Kultura da aurtengo gai nagusia, «herrian puri-purian baitago» Martiarenaren ustez. «Herriko kulturgintzak egun duen indarra ikusita, une aproposa iruditu zitzaigun gai hau lantzeko». Hala, herriko hogeitik gora sortzaileri «aitortza txiki» bat egin nahi izan diete lehenik, baina bestetik, herriko haurrak diziplina ezberdinetara gerturatu nahi dituzte, «haien barruan zerbait pizteko» asmoa baitute. «Balio asko transmititzen dizkiegu: euskararen beharra, naturaren zaintza, feminismoa, herrigintza…», nabarmendu du Abaraxkako kideak.
Balio horiek, mahai gainean
Gogoz eta ilusioz jaso dute sortzaileek Abaraxkaren gonbidapena. Allende Arnaiz eta Idoia Beratarbide dira aurtengo protagonistetako bi, asko gozatu dituzte haurrekin egindako saioak, hori kontatu diote Hitza-ri. «Ilusio handia egin dit gonbidapenak, aitortza txiki bat bezala jaso dut», aitortu du Arnaizek.
Arnaiz eta Beratarbidek batera eskaini dituzte euren saioak. Horietan zigiluekin gorpuzkerak margotu dituzte haurrek, «gorpuzkera eta genero aniztasuna lantzeko asmoz», Arnaizen hitzetan. Talde lanari ere garrantzia handia eman diote, eta erakutsi diete etxeko gauzekin «gauza oso politak» egin daitezkeela.
Beratarbidek ere balioan jarri du ludotekak egiten duen urteroko apustua, «heziketari begira herriak esfortzu berezia» egiten duela uste du: «Benetan garrantzitsua da haurrek in situ sortzaileen lana lehen lerrotik ikustea, ikus dezatela asko garela lanean ari garenak»
