"Hilero garraiolari bat hil da Euskal Herriko errepide eta industrialdeetan"
Atzo lanean ari zela zendutako garraiolaria gogoratzeko elkartu dira gaur DSV enpresaren atarian, gehiengo sindikalak deituta. "Lan baldintza kaxkarren aurkako neurriak" exijitu dituzte.
DSV enpresaren atarian elkartu dira. Atzo lanean ari zela Oiartzunen zendutako garraiolaria gogoratu dute gaur Lanbarren industrialdean, gehiengo sindikalak (ELA, LAB; ESK, STEILAS, Hiru eta EHNE) elkarretaratzera deitu baititu langile eta herritarrak. DSV enpresaren atarian bildu dira eguerdian, enpresa honek kontratatu baitzuen 52 urteko garraiolaria, Botrans enpresarentzat aritzen zen lanean. Lan istripu gehiagorik ez, prekarietatea hiltzailea lemapean bildu dira.
Atzoko heriotzarekin Euskal Herrian lan istripuetan jada 50 langile hil direla salatu dute lehenik. Horietatik zortzi dira kamioilariak, hori nabarmendu dute Hiru sindikatuko ordezkariek. “Hilero garraiolari bat hil da Euskal Herriko errepide eta industrialdeetan”, esan dute, haserre.
Elkartasuna helarazi diete zendutako langilearen senide, lankide eta gertukoei, “horrelako une eta gertaera latzak berriro gerta ez daitezen agintariei lan baldintza kaxkarren aurkako neurriak eskatzearekin batera”.
Europa ekialdekoa zen langilea, “nazioarte mailan ibilbide luzeko lanak egiten zituena” sindikatuen arabera. Garraiolarien lana “gero eta estuagoa” dela salatu dute gaur. “Enpresek eragindako presio eta presak estresa sortzen dute, baita atsedenaldi eta gidaldien arauaren ezaugarriek eta, oro har, bizimodua aurrera ateratzeko sektorean diren zailtasunek”.
Bihotzekoak jota zendutako garraiolarien kopurua handia dela erantsi dute, eta Eusko Jaurlaritzari zuzendu dira, salatuz, hark duela “erabaki politikoaren ardura”. Lan ikuskaritza indartzeko exijitu dute, “lan baldintza kaxkarrak saihesteko eta arauak betetzen ez dituztenak zigortzeko”. Horregatik, garraiolarien artean gaitz kardiobaskularren kopuru, ondorio eta eragin handia aintzat hartu beharko litzatekeela erantsi dute, gertaera hauek baitira, sindikatukoen arabera, “enpresek eragindako presa eta presioen ondorio”.
Bihotzeko gaitzekin lotutako istripu asko ofizialki heriotza naturaltzat hartzen direla ere salatu dute, eta erantsi “horrelako gertaerak, zalantzarik gabe, lan istripuak direla”.
