Garraiolari bat hil da Lanbarrenen, ondoezik sentitu ondoren
Langilearen heriotza salatzeko elkarretaratzea egingo dute bihar, gehiengo sindikalak deituta. Lanbarrenen bilduko dira, eguerdian.
Hormigoia bota dute errepidean. LAB sindikatuak jakinarazi berri duenez, garraiolari bat hil da gaur Lanbarren poligonoan, lanean ari zela ondoezik sentitu ondoren. Sindikatuak eskuratutako informazioaren arabera, 52 urteko garraiolaria da istripu ez traumatikoan zendutakoa.
Sindikatuak salatu duenez, aurten jada 50 langile hil dira euren lanpostuetan. “Odol jarioak ez du etenik”, diote sindikatukoek.
Lan istripuek eragindako heriotza hauen aurrean “hausnarketa sakona” ireki behar dela uste dute LABeko kideek. “Nola da posible gure ekoizpen sistema lan baldintza prekarioetan oinarritzea? Honek atzetik dakartzan norbanako dramak ikusita. Zein baldintzapean ari zen lanean kamioilaria? eznbat egun zeramatzan klanean? Betetzen al zituen zegozkion lan osasunerako arauak?”, diote, haserre. Garraiolarien aktibitatea Europan “sakonki prekarizatua” dagoela erantsi du sindikatuak.
Administrazio publikoek euren “gabezia handiei konponbidea” eman behar dietela ere esan dute, “eta ezagunak diren arrisku gune eta koordinazio espazio horietan beharrezko kontrol neurriak” ipini behar dituztela.
Horregatik, Eusko Jaurlaritzari zuzenduz, lan ikuskaritzarako aurrekontua “modu esponentzialean indartu” behar dela uste dute sindikatukoek, “dagokion tresnak erabiliz”. Horrez gain, lan osasun arauak betetzen ez dituzten enpresei hobariak kentzeko beharrezko tresnak ezarri behar direla ere esan dute.
“Lan baldintza duinen alde borrokatzea da gure hautua, ez dadila errepikatu ez Oiartzunen eta ez inon horrelako kasurik. Gure osasuna dago jokoan! Langileon eskubideak errespetatu!”, aldarrikatu dute azkenik.
Elkarretaratzea, bihar
Garraiolariaren heriotza salatzeko mobilizazio bat egingo dute bihar (hilak 17, 12:00etan), Lanbarrenen, gehiengo sindikalak deituta.
