Pantaila akustikoak jartzen hasi dira Beraunen
1,2 kilometroko tartean egingo ditu lanak Bidegik: Arramendiko zubibidearen eta Pasaiako porturako eta Errenteria-Oreretako 2. irteeraren artean hain zuzen. Zortzi hilabete inguruko iraupena izango dute lanek.
Bidegi foru agentziak Beraun auzoko pantaila akustikoak jartzeko lanei ekin berri die. Zehazki, 1,2 kilometroko tartean egingo dituzte lanak: Arramendiko zubibidearen eta Pasaiako porturako eta Errenteria-Oreretako 2. irteeraren artean hain zuzen. Zarataren kontrako pantaila hauek instalatzeko 1.575.000 euroko inbertsioa egingo dute, eta lanak zortzi hilabetean bukatzea aurreikusi dute. Lan hauetarako GI-20 errepideko eskuineko erreia itxi beharko dute, Donostiarako noranzkoan. Obrak bukatu arte iraungo du mozketa horrek, hain zuzen, 2023ko maiatzera arte.
Metalezkoak izango dira pantailak eta fonoxurgatzaileak Bidegiko iturrien arabera. Zubiaren 178 metroetan jarriko direnek bi metroko garaiera izango dute, eta Beraungo auzo aurrealdean handiagoak izango dira. lau metrokoak. GI-20ra ematen duen pantailaren zatiak txapa zulatu bat izango duela aurreratu dute, eta horri esker, soinua haren barrualdera igaro ahal izango dela. Bertan harri-artilezko geruza dago, trafikoak sortutako soinua xurgatzeko asmoz.
Eremu horretan egun 3.900 lagun inguru bizi dira, eta gauez 55dB baino gehiagoko zarata mailak jaso dituzte azken urteetan. Pantailek “egoiliarren bizi-kalitatea hobetuko” dutela esan dute.