Tentsio uneak urriko osoko bilkuran
Altzateko Hiri antolamendurako Plan Bereziaz, Beraungo anbulatorioko murrizketez edota Onkologikoaren egoeraz aritu ziren atzoko saioan, luze. Gai hauek liskarra eragin zuten taldeen artean.
Atzoko saioaren irudi bat. Udalbatzaren ohiko osoko bilkura egin zuten atzo arratsean udaletxean, aspaldian egindako luzeenetako bat izan zen, ia bi orduz luzatu zuten. Adostasuna nagusitu bazen ere, eztabaidarako tartea ere izan zen, handia, bereziki EH Bildu eta PSE-EEren artean akusazioak eta tentsio uneak izan ziren.
2023 urterako Ordenantza Fiskalen hasierako onarpena adostuz hasi zuten atzokoa, EH Bildu, Ahal Dugu eta EAJk aurkeztutakoa hain zuzen. Sozialistek euren proposamena eraman zuten atzoko plenora, baina azkenean, hiru taldeen artean adostutako proposamenak egin zuen aurrera, aho batez. Honen arabera, lehenengoz izoztuko dituzte tasak, “salbuespenezko egoera” batean hartutako erabakia dela esan zuten EH Bildukoek. “Oso pozik” agertu dira lortutako adostasunarekin.
PSE-EEren proposamenak aldeko 6 boto, kontrako 12 (EH Bildu eta Ahal Dugurenak) eta 3 abstentzio jaso zituen, azken hauek, jeltzaleenak.
Altzateko Hiri antolamendurako Plan Bereziaren 1. Aldaketa Puntual Partzialean heldu zen liskarra. Onartu aurretik, alkateak PSE-EEk joan den ekainean “egindako akusazio gogorrak” gogorarazi zituen, “alarmismoa” egitea leporatu zion Isaac Palenciaren taldeari. Palencia Kostasek proiektuaren kontra aurkeztutako dokumentuaz aritu zen, eta alkateak nabarmendu zuen ez dela halakorik existitzen, gezurretan aritzea leporatu zion. Liskarra izan arren, alderdi guztiek proposamenaren alde egin zuten, beraz, behin-betiko onartu da proiektua.
Bestetik, Beraungo anbulatorioko ordutegiak murrizteari buruzko mozioa ere bozkatu zuten atzoko saioan, honek ere liskarra eragin zuen. Mikel Lizarralde errenteriarrak hitza hartu zuen, itxieraren ondorioz Iztietako anbulatorioa jasaten ari den “kolapsoa eta egoera ikaragarria” salatu zuen zinegotzien aurrean. Mozio honek ia talde guztien babesa jaso zuen (18 boto guztira), EAJren hiru zinegotziek kontra egin zuten. Gai honekin kanpaina egitea leporatu zion atzo EAJk PSE-EEri.
Azkenik, Onkologikoaren egoeraren inguruan EH Bilduk eta Elkarrekin Errenteriak aurkeztutako mozioa bozkatu zuten. Enpresa batzordeko kide Jon Galfarsorok hartu zuen hitza, azpiegituraren “utzikeriaz” aritu zen, gertutik ezagutzen baitu Onkologikoaren egungo egoera. EAJk mozio alternatibo bat aurkeztu bazuen ere, ez zuen nahikoa babesik jaso. Gobernuko bi taldeek aurkeztutakoak aldiz, aldeko 18 boto jaso zituen, eta hiru abstentzio, EAJrenak.
