Beraungo anbulatorioko murrizketen kontra mobilizatuko dira herritarrak
Larunbatean elkarretaratzea egingo dute, murrizketen ondorioz Iztietako anbulatorioan sortzen ari den "aglomerazio eta gainkarga handia" salatzeko. Murrizketari "aski da" esango diote auzotarrek, "pazienteekiko harremana, prebentzioa eta osasun publikoa kaltetzen baititu".
Joan den hiletik Beraungo anbulatorioa arratsaldez ixten ari dira, jaurlaritzak hainbat murrizketa egin baititu auzoko osasun zentroan. Egoera horren aurrean, herriko auzo elkarteek, Duintasunak eta Beraun, Galtzaraborda eta Kaputxinoetako Erretiratuen Etxeek mobilizazioa iragarri dute datorren larunbat honetarako (hilak 26). 12:00etan bilduko dira, anbulatorioaren aurrean.
“Erabat baztertzen dugu gure anbulatorioko ordutegiaren murrizketa, gu guztion anbulatorioa, zeinean hiru orduko osasun arreta kendu diguten, eta ondorioz 17:00etatik aurrera Iztietara jaistera behartzen gaituzte”, esan dute, amorruz. Murrizketak hasi zirenetik “aglomerazio eta gainkarga handia” izaten ari dela erantsi dute, eta horrek “kalte larria” eragingo duela herritarren artean.
Beharrezkotzat jo dute “oinarrizko laguntzaren hasierako ideia berreskuratzea, non prebentzioa eta osasunaren sustapena ardatz nagusiak izan behar diren”. Azken urteotan osasunaren O hizkia galdu duen oinarrizko arreta dagoela diote, eta zerbitzu honetan herritarrena arretaren gero eta eskaera handiagoa jasotzen ari direla. “Hau da, gaixotasuna tratatzen dute, baina ez dute ezer jakin nahi gure osasun egoerari buruz”.
Horregatik osasun langileen gainkarga egoera eragiten ari den gastu murrizketari “aski da” esango diote larunbatean, “pazienteekiko harremana, prebentzioa eta osasun publikoa kaltetzen baititu, osasun eredu komunitarioa ahaztuz eta baztertuz”.
