Txerri Eguna pandemia aurreko egoerara bueltatuko da
Ttur-ttur Euskaltzaleon Bilguneak Txerri Eguna antolatu du hilaren 17rako, 2020 eta 2021eko neurririk gabe. 80 postu izango dira.
Baserritar jantzi onenari saria emango diote. Txerri Eguna pandemiaren aurreko egoerara bueltatuko da aurten. Duela bi urte ez zen ospatu, eta iaz hiru zatitan banatu zuten.
Aurten bi izango dira guneak: Madalensoro eta Elizalde ikastetxeko pilotalekua. Bertan hartuko dute aterpe artisau eta sortzaileek jarriko dituzten 80 postu inguruk. Horrez gain, beste aldaketa bat egongo da: aurten janari eta edari postuak bueltatuko dira, iaz balizko kutsatzeak ekiditeko kendu baitzituzten.
Urtero bezala, baserritar jantziarekin joatera animatu dituzte oiartzuarrak. Izan ere, jantzi onena duenak sari bat lor dezake.
Egitaraua
- 10:00etatik 14:00etara: artisau eta ganadu feria.
- 11:30: Erraldoi txikien kale buelta herriko plazatik abiatuta. Abaraxka eta Soinueneak antolatu dute, eta herriko ikastetxeetako dantza taldeek lagunduko dute.
- 13:00: Itturri Merkatarien Elkartearen zozketa. Sari banaketa Elizaldeko frontoian egingo dute.
- 13:30: Hainbat sariren zozketa, eta baserritar jantzi politenari saria. Sari banaketa Elizaldeko frontoian egingo dute.
