'Txori urdinak' liburuaren irakurketa saio publikoa antolatu du Sarek
Santi Cobos presoaren bizipenetan oinarritutako liburuaren irakurketa egingo dute datorren ostegunean (hilak 15). "Kartzelaren erretratu gordina" egin du lan honetan Zigor Olaberriak.
Oreretako Sarek antolatuta, Santi Cobos presoaren bizipenetan oinarritutako Txori urdinak liburuaren irakurketa egingo dute Reina aretoan datorren ostegunean (hilak 15), 18:00etatik aurrera. Bertan izango dira Zigor Olabarria egilea eta presoaren lagun Gorka Lazkano oreretarra.
Espetxearen erretratu bat osatu du Olabarriak liburu honetan. “Kartzelaren egoera eta bizitza erakusteko beste erretratu bat” dela azaldu dio HITZAri Sareko kide Josu Galarragak. Bizitza erdia eman zuen Cobosek espetxean, 25 urte inguru pasatu ditu, “espetxealdi bereziki gogorra” izan zuen. Hainbat euskal preso ezagutu zituen urte horietan, haiekin “harreman estuak” sortu zituela erantsi du Galarragak. “Berak kanpotik ikusten du euskal presoen afera, beste ikuspuntu batetik ikusitakoarekin egindako erretratu gordina da”.
Liburuaren hainbat zati irakurriko dituzte osteguneko saioan. Sareko kideak aurreratu du 20tik gora lagunek hartuko dutela hitza.
Emanaldi hau Errenteriako Udalak joan den astean abiatutako Giza Eskubideen VIII. Jardunaldien barruan sartu dute.
