Lurra aldatu, horma bota eta gela margotuko dute, makinak aldatzeaz gain. Gune kardiobaskularrean ere aldaketak izango dira.
Kardiobaskularreko gailu batzuk ere berrituko dituzte. 
Elorsoro kiroldegiko gihartze-gelan eta entrenamendu kardiobaskularra egiteko guneetan aldaketak izango direla iragarri du Oiartzungo Udalak.
Gihartze jarduerak egiten den eremuko lurra berrituko dute eta bi guneak banatzen dituen horma ezabatuko dute.
Gainera, makina guztiak aldatuko dituzte, denboraren poderioz zahartuta geratu direlako. Honakoak izango dira aldatuko dituzten gailuak: Sektorizatutako hogei makina (bular eta sorbalda press; prentsa hankak; abduktore/aduktore duala; abdominalena…); geltoki anitzeko bi makina eta pisu libreto entrenamendua egiteko ekipamendua.
Entrenamendu kardiobaskularreko gunean ere izango dira aldaketak: 11 bizikleta estatiko, hiru eliptiko eta eskailerak igotzeko bi makina ere berrituko ditu udalak.
177.333,45 euro bideratuko dituzte makina berriak erostera. Horietatik 114.504,45 gihartze makina berrietara bideratuko dituzte, eta beste 62.829,01 euroak kardiobaskularreko makinetarako izango dira.
Kontratazio prozesua martxan dagoela adierazi du udalak, eta udararako prest izango da.
