Isaac Palencia zinegotziak azaldu du kiroldegietako langileen soldata igoeraren ondorioz hartu duela erabakia udalak. Herritarrek igoera hori asumitu behar izatea "onartezina" dela uste dute sozialistek.
PSE-EE taldeak herriko kiroldegien tarifek %7ko igoera izango dutela salatu du gaur. Isaac Palencia zinegotziak azaldu du kiroldegietako langileen soldata igoerarekin batera hartu duela udalak tarifak igotzeko erabaki hori, akordio batetara heldu berri baitira Serviocio enpresarekin. Langileen borrokak lortutakoarekin pozik agertu dira sozialistak, baina herritarrek igoera hori ordaindu behar izatea “onartezina” dela uste dute sozialistek.
Horregatik, langileen soldata igoera hori udalak asumitu dezala exijitu dute, “eta ez herritarrek”. Igoera hori joan den urtarrilaren 30ean onartu zutela azaldu dute, “modu eztabaidagarri batean gainera”. Erabiltzaileek SMS bat jaso dute aste honetan, eta honetan udalak igoera hori “estali” duela salatu dute.
Igoera hau, lehen eta orain, “saihesgarria” dela erantsi du Palenciak. “Udalak asumitu beharko luke igoera hori, kontuan hartuta, gainera, prezioen igoerek eragin duten egoera gogor honetan gaudela”.
