Babes sozialeko 27 etxebizitza eraikiko dituzte Esnabiden
Jaurlaritzari lur sail bat lagatzea onartu berri du udalak. Akordio honen bitartez, Jaurlaritzak 4 urteko epean eraiki beharko ditu alokairuzko etxebizitza horiek.
Eneko Del Amo eta Aizpea Otaegi, gaurko agerraldian. Kaputxinoak auzoko Esnabide kalean babes sozialeko 27 etxebizitza eraikiko dituzte datozen urteetan, udalak bertako lursail bat lagatu berri baitio Jaurlaritzari. Joan den asteko plenoan onartu zuten lagapena, aho batez. Akordio honi esker, 4 urteko epean alokairuzko etxebizitzak eraikitzeko konpromisoa hartu du Jaurlaritzak.
Horri lotuta, babes sozialeko etxebizitzen sutapenean Errenteria-Orereta “lehentasunezko udalerritzat jotzeko” konpromisoa ere hartu du Jaurlaritzak, hori azaldu du Aizpea Otaegi alkateak. Hala, errenteriarrak izango dira lehen tasunezko hartzaileak.
Alkateak gaineratu du Esnabide sektorerako 2006an onartutako planteamendutik eremuak hainbat hobekuntza jasan dituela, eta agintaldiko plana betetzen jarraitzen dutela. Besteak beste, berdeguneak eta kirol espazioak handitu dituzte, eta esaterako, 88 aparkalekuko parking bat ere eraiki dute kalean bertan. Hobekuntza hauek herriko hainbat eragilerekin elkarlanean adostu direla erantsi du.
Eremu honetan eraikiko dituzte etxebizitzak.
